Wir^a die priorin vnd der conuent gemainlich des gotzhus ze Tozz¹ Prediger ordens in||
Costentzer bystum veriehen vnd tunt kunt allermenglichem mit disem brief, alz die edel||
wolgeborn frow frow Kungund von Montfort graff Wilhelms von Montfort herren ze Bregentz||
elichi wirtenn grafenn von Toggenburg² vns einer rechten fryen gotzgab fur sich vnd alle ir erben an daz egenant vnser gotzhus ledklich geben hât iren eignen man Heinin Wellenberg von Wil³ pfrunder in vnserm gotzhus mit lib vnd gut vnd mit aller zugehord, alz der brief wiset, so wir dar vmb von ir besigelten inne haben, daz wir dar vmb wissentklich vnd wolbedaht mit gemeinem einhelligem rât vnsers cappittels fur vns vnd alle vnser nachkomen gelobt haben bi der truw vnd gelubt, so wir vnserm gotzhus vnd orden schuldig syen vnd getân haben, vnd lobent ôch ietz vestenklich mit disem brief, dz wir vnd alle vnser nachkomen von derselben gab wegen nu hinnan hin jemermer ewklich getruwlich gen got gedenken sollent vnd wellent der vorgenanten frow Kungund von Montfort, graff Wilhelms von Montfort herren ze Bregentz ires elichen wirtz, graff Tonatz von Toggenburg⁴ ires vatter salgen vnd frow Menten von Montfort geborn von Toggenburg⁵ ir swoster salgen, vnd dz wir vnd vnser nachkomen ôch nu hinnanhin iarklich begân sollen in vnserm gotzhus der ietzgenanten graff Tonatz salgen von Toggenburg, frow Menten salgen von Montfort siner tohter vnd ôch der obgenanten frow Kungund von Montfort vnd graff Wilhelms ir elichen mans, wenn si abgânt, jarlichen tag vnd iarzit, alz in vnserm gotzhus sitt vnd gewonlich ist solichi iarzit ze begân, ân geuard. Des ze warem offem vrkund so haben wir vnsers prioratz vnd conuentz insigel fur vns vnd alle vnser nachkomen offenlich gehenkt an disen brief. Der geben ist in vnserm gotzhus ze Tozz nach Cristz geburt vierzehenhundert iar, dar nach in dem sibenden jar, an des heilgen crutz aubent inventionis.