Ich^a Johans von Ainwill¹ burger ze sant Gallen tun mannlichem ze wissen mit disem brief, das ich reht vnd redlich||
verlihen hân zu ainem rehten erblehen vnd och in erblehens wis dem beschaiden Johansen Vorster, den man nempt||
Goggenler, vnd allen sinen erben das vorstlehen vnd och das gut, das gelegen ist in dem Rodmonten², mit aller zugehorLde also mit der mayerlut vnd och mit der nachpuren gunst vnd willen mit samlichem gedinge vnd rehten, das der vorgenempt Johans Vorster vf das vorgenempt gut zimren vnd ziehen vnd och sitzen sol, vnd sol och in eren es vnd vnwustlich haben. War och, das der vorgenempt Johans Vorster oder sinen erben, ob er enwar, ab dem vorgenempten gut woltint oder mustin ziehen, so habent die mayerlut genomen vnd erwelt den beschaiden Johansen Ortwin vnd der wolbeschaiden Johans Vorster Johansen Sailer och burger ze sant Gallen, vnd wes sich die zwen da bekennent, das der vorgenant Johans Vorster oder sin erben den mayerluten tun sol, ob su dz gut nit in êren hettint gehept oder die mayerlut dem vorgeseiten Johansen Vorster oder sinen erben tun sond fur iren schaden, dz si gebuwen habent, da bi sond si beliben ze baiden siten^b, mohtint aber die zwen nit vber ain komen, so sond die selben zwen nemen ainen gemainen man, der in dem ampt gesessen si, der och als schidlich si vnd fuglich ze baiden tailn als su, vnd wes sich denn die driy oder der mertail vnder in bekennent, da bi sond su ze baiden tailen beliben, als su ze baiden tail gelobt vnd verhaissen habent. War och, das dewedre schidman abgieng von todes wegen oder suss vnnutz wurdi, dz got lang wend, zu dewederm tail das beschah, so sol der selb tail, dem denn sin schidman abgangen ist, ainen andren schidman neman, der in dem ampt gesessen si vnd och als schidlich vnd fuglich si als der vordrig, der abgangen ist. Es ist och mit namen beret, das der vorgenant Johans Vorster vnd sin erben des vorgeseiten vorstlehens vnd och des vorgenanten guts vnd amptes getruwe kneht sin sond^c, als es von aller sitt reht gewonlich gewesen ist. Vnd des alles ze offem warem vrkund alles des, so hie vor geschriben stat ain disem brief, so han ich vorgenempter Johans von Ainwill min aigen insigel gehenkt ain disen brief von der lehenschaft wegen vnd och von bett wegen der vorgenempten mayerlut vnd Johansen Vorsters, doch mir selb vnd allen minen erben ain allen vnsren zinsen nutzen rehten vnd gewonhaiten gantzlich vnschadlich. Dis beschach vnd wart diser brief geben ain dem nachsten mantag nach vnsers herren fronlichams tag in dem jar, do man zalt von gottes geburt vierzehenhundert vnd siben jar.