Ich^a Cunrat Jutzi burger ze Byschoffzelle¹ tun kunt vnd vergich offenlich mit disem brief allen, die in sehent oder horent lesen, alz mich die ersamen wisen||
der burgermaister der rat vnd die burger ze sant Gallen gehainmot gestraft in iro vanknuss vnd banden hattent vmb das ich mich gen in vber sehen||
vnd wider si getan hatt, anders dann ich tun solt, won aber mich die selben der burgermaister vnd der rat ze sant Gallen vor an durch got vnd durch miner||
herren des burgermaisters vnd des rates ze Costentz des vogtz vnd des rates ze Byschoffzelle ernstlichen bet wegen vss ir vanknuss vnd banden ledig gelassen hant, darumb so han ich willeklich vnbezwungenlich vngebunden vnd vngefangen gesund libes vnd mutes offenlich gesworn ainen gelerten aide liplich ze got vnd ze den hailigen mit vfgehabenen vingern, vmb die vorgedahten vanknuss strâff vnd getat der vorgedahten des burgermaisters des rates vnd aller burger vnd burgerinen gemainlich vnd sunderlich der statt ze sant Gallen vnd aller iro helffer vnd ieklichs besunder vnd och aller dero, die an der selben miner vanknust straff vnd getat schuld gehebt hant in dehain wis ald ratent oder helffent darzu gewesen sint hainlich ald offenlich, luter gantz vnd gut frund ze sinne vnd alle min frund inen darumb ze frund ze gewinnen ân allen furzug vnd die selben vanknuss straff vnd getat niemer ze andenn noch ze aferrenn weder mit geriht noch ân geriht mit worten noch mit werken noch in dehain wise noch nieman andre an miner statt noch von minen wegen. Ich han och in den vorgeschribenn aid genomen vnd gesworn, von den obgenanten burgern vnd burgerinen ze sant Gallen allen gemainlich vnd von ir ieklichem besunder reht ze nemenn in der statt ze sant Gallen vor irem geriht vmb alle die stoss vnd zuspruch, die ich ietz zu^b han ald hie nach iemer zu in gewunni, es sien frowen oder man knaben oder tohtren, ich werd dann ie von minen ansprachigen rehtlos gelassen vnd werd och das kuntlich, so ist mir behalten, daz ich von den ie dann reht nemen mag an den stetten, da es dann muglich vnd billich ist, ân geuarde. Vber diz alles han ich mich des willeklich verbunden also, war, da vor got sie, daz ich oder ieman von minen wegen die vorgedahten vanknuss straff vnd getat iemer andoti oder aferti in dehain wis vnd den vorgeschribenen aid iemer uber sahi vnd uber fur mit dehainen sachen, wenn ald wa das beschach, das danne der burgermaister der rat vnd die burger ze sant Gallen gemainlich vnd ieklicher besunder vnd all iro helffer, wer die sint, mich an griffen hainmen vnd vahen sont vnd mugent ân als reht ân zorn vnd ân klag vff dem land vff wasser in dorffen in margten vnd in den stetten ald wa su mich dann an komen vnd ergriffen mugen, vnd daz su mich dann fur ainen schadlichen verschulten vertailten verzalten man verderben vnd von dem lib tun sont vnd mugent ân alz reht vnd ân vrtail, vnd sol mich hie vor noch hie wider niht schirmen friden friien noch gut sin kain frihait kain gewonhait kain burgreht kain buntnuss noch ainung enkain reht gaistlichs noch weltlichs kain gelait kain gnâd noch gesetzt der herren noch der stetten noch enkainer lay ander sach schirm behelf noch furzug, so ieman finden vsziehen oder erdenken kundi in dehain wis, won ich mich mit namen verzigen han aller helf aller gnaden alles vszugs alles schirms vnd alles des, da mit ich mich wider dis vorgeschribenen sachen vnd verbuntnust iemer gesetzzen ald da wider gereden oder gewerben kundi oder mohti in dehain wis ald ieman andre an miner statt oder von minen wegen. Vnd des alles ze offem warem vrkund vnd stater sicherhait aller vorgeschribenen dinge vnd vergiht so han ich Cunrat Jutzi da vorgenant erbetten den fromen vesten junker Fritzen von Ainwille² zu disen ziten stathalter ze Byschoffzelle, daz er sin insigel fur mich gehenkt hat an disen brief, vnder des insigel ich mich in diser sache willeklich gebunden han, won ich aigens insigels niht han, des och ich obgenanter Fritz von Ainwille mir vnd minen erben ân schaden vergich an disem brief. Der geben ist ze sant Gallen an dem nahsten mantag nach vnsers herren fronlichamen tag des jares, do man zalt von Cristus geburt vierzehenhundert jar vnd darnach in dem sibenden jare.