Allen^a den, die disen brief ansehent lesent oder horrent lesen, tund wir nachgenanten Hainrich vnd Geori die Schamel bruder||
burger ze Wil¹ kund vnd veriehent offenlich mit disem brief fur vns vnd vnser erben, das der hohwirdig||
furst Cun von gotz gnaden abt des gotzhus ze sant Gallen² vnser gnadiger herre vns vnd vnsern elichen||
liberben reht vnd redlich verlihen hat ain hofstat ze Rikkenbach³ gelegen an dem bach vnder^b des vorgenanten gotzhus muli da selbund mit hofraiti vnd mit aller zu gehord wît vnd brait, daz wir da selbund vff der hofstat zu vnserm antwerch, als wir kupferschmid sint, ainen wasserhamer machen sollent vnd mugent vnd denn da werben vnd tun, was vns ze vnserm antwerch notdurftig ze tund sy vnd ze machenn vnd ie denn, so es notdurftig ist, ze bessrenn an des selben vnsers gnadigen herren vnd siner nachkomen sumen vnd ierren vnd an allen iren schaden gantzlich, wol mugent wir in des gotzhus holtzern, es war in dem Bergholtz⁴ ald anderswa holtz vnd tachch^c howen vnd dannen furren, als wir denn des ie ze mal darzu vngeuarlich notdurftig sint, von erlobens wegen des obgenanten vnsers gnadigen herren abt Cunn. Wir sollent och den wasserhamer vnd was wir vff der vorgenanten hofstad machent ze Rikkenbach, das zu vnserm antwerch gehort, also vngeuarlich niessen vnd bruchen, das es vnsern mullern ze Rikkenbach ze den ziten, so si denn da notdurftig sint ze malen, dehainen schaden bring an dem maln vnd dem gotzhus och an schaden sy. Vnd von der selben hofstat sollent wir vnd vnser elich lib erben, ob wir enwarint, dem obgenanten vnserm gnadigen herren ald sinen nachkomen, so er enwar, nû ze dem nahsten sant Martis tag, der in dem nahsten kunftigen jar kumpt nach dem jar, als dirre brief geben ist, vnd dannenhin allerjarlich ie vff sant Martis tag ze rehtem zins geben ain pfund pfenning guter vnd genamer Costentzer muns, als lang wir die haben vnd niessen wellent, vnd daz man vns die hofstat nut nemen noch dauon trengen sol weder durch lieber mans noch me zins willen. War aber, dz wir ald vnser elich lib erben, die denn die vorgenant hofstat ze Rikkenbach nach vnserm tod hettint vnd nussint, den vorgenanten jarlichen zins vff den vorgenanten sant Martis tag dem obgenanten vnserm gnadigen herren abt Cunen oder sinen nachkomen jarlich nit gabint noch vsrihtint gantzlich vnd gar vnd denn daz verzuginnt als lang, vntz das ain zins den andern erluffi, dannenhin so mag der selb vnser gnadiger herre abt Cun ald sin nachkomen, wenn sy wellent, die vorgenant hofstad mit ir zu gehorden, als si denn ist, zu iren handen nemen vnd ziehen vnd die besezzen, als inen denn geuellig ist, dz si ir zinses sicher sigint, an vnser vnd vnser erben sumen vnd ierren gantzlich an geuerd. Och lobantt wir bi guten truwen vnd mit disem brief, alles dz war vnd stat ze halten fur vns vnd vnser erben, was da vorgeschriben stat, vnd da wider niemer ze tund. Vnd des ze offnem vnd warem vrkund dirr vorgenanter ding habent wir erbetten den vesten Vlrichen Estrich ze disen ziten schulthass ze Wil⁵, dz er sin aigen insigel fur vns vnd vnser erben offenlich gehenkt hat an disen brief, im vnd sinen erben vnschadlich. Geben ze Wil an dem nahsten ffrytag nach sant Jacobs tag nach Cristi geburt vierzehenhundert jar vnd dar nach in sibenden jare.