Den^a erbern wisen vnsern guten frunden dem amman vnd||
den lantluten von Schwitz¹, die ietz die reis gezogen||
sind, embieten wir der schultheiss vnd der rat ze||
Rapreschwil² vnser fruntlich dienst. Als vnser bottschafft mit vch gerêdt vnd vch gebetten hat von vnser burger wegen, sond ir wissen, daz Heinrich Russinger vnser burger eigen lut huser vnd hof hat in dem Turgow vnd da bi Wil³, als die hienach benempt sind, Hans Gunther^b vnd der Wagner vnd des Gunthers sun vnd Hans Meijger, item der Guntherinen sun von Metzikon⁴ hât zwei huser, item ein hus ze Atzenwil⁵ hat der Schuhterman. Die selben huser wil och vnser burger zeichnen mit vnser statt zeichen, daz sind zwen rot rosen. Bitten wir vwer guten fruntschafft, daz ir die selben vnsers burgers lut vnd gut schirmen wellint, als wir vch wol getruwen. Geben mit vnser statt vffgedrukten insigel ze end diser geschrifft an fritag nach sant Bartholomes tag anno domini MoCCCCo septimo.