Allen^a, die disen brief sechent oder horent lesen, kunden wir der burgermeister der nachgeschriben rât vnd die zunftmeister der statt Zurich,||
das die erbern geistlichen herren der apt vnd der conuent gemeinlich des gotzhus ze Cappell¹ des ordens von Cytels in||
Costentzer bistum gelegen iren hof, den man nempt der hof ze der Zuben², ze Wolishofen³ gelegen, den Rudolf Ris von Wolishouen||
buwet, giltet jerlich zwey jar jetweders jares nun mut kernen vnd dann in dem dritten jar acht mut kernen zwey herpsthunr vnd funfzig eyer, mit steg mit weg vnd mit allem dem rechten, so dar zu gehort, fur ledig frij eigen ze koffen geben hant dem erbern Johans Koch von Vtznach⁴ vmb hundert guldin vnd vmb vierzechen guldin guter vnd geber an gold vnd an gewicht, des selben geltes och si nach ir vergicht jetzu von im gar vnd gentzlich bezalt vnd gewert sint, vnd dar vmb so hant die obgenanten der apt vnd der conuent des egenanten gotzhus fur sich vnd ir nachkomen mit guten truwen gelopt, des egenanten hofs mit allem recht, so darzu gehort, were ze sinne des obgenanten Johans Kochs vnd des erben fur ir ledig frij eigen vor geistlichen vnd vor weltlichen gerichten vnd mit namen an allen den stetten, wo vnd wenne ald wie dik si des notdurftig sint, âne geuerd. Sich hant och die obgenanten der apt vnd der conuent des vorgenanten gotzhus jetzu gar vnd gentzlich entzigen alles des rechten vordrung vnd ansprach, so si oder ir gotzhus nachkomen nach dem obgenanten hof mit allem recht, so dar zu gehort, in dehein wise jemer gewinnen oder gehaben mochten gen dem egenanten Johans Koch oder gen des erben mit geistlichen ald mit weltlichen gerichten oder mit deheinen andern sachen, âne geuerd. Her vber ze einem offennen vrkund, won wir dis horten vnd sachen, so haben wir vnser statt insigel offenlich gehenkt an disen brief. Der geben ist an dem zwelften tag des ersten herpstmanodes, do man zalt von Cristus geburt vierzechenhundert jar, dar nach in dem sibenden jare. Vnser des rates namen sint Bantleon ab Inkenberg, Jacob Bletscher, Rudolf Kilchmatter, Jacob Glenter, Johans Hert, Johans Hagnower, Johans Keller, Heinrich Obrist, Heinrich Hagnower, Vlrich Grêw, Peter Rordorff, Lutold Stûdler vnd Johans Hechelbart. Der zunftmeister namen sint Cunrat Tascher, Rudolf Brunner, Heinrich Smit von Rumlang⁵, Johans Meijer, Johans von Ruty, Rudolf Lebertos, Johans Muller, Johans Koch, Caspar Teilinger, Vlrich Furer, Rudolf Trinkler, Johans Bluwler vnd Vlrich Richwin. Wir die vorgenanten der apt vnd der conuent gemeinlich des egenanten gotzhus ze Cappell veriechen ôch alles des, so von vns an disem brief geschriben stad, vnd haben ôch das fur vns vnd fur vnser nachkomen mit guten truwen gelopt, wâr vnd stat ze halten. Vnd des alles ze einem offennen waren vrkund vnd meren gezugnuss diser ding so haben wir der obgenant apt vnd der conuent vnseru insigel zu der obgenanten statt vnd der burger Zurich insigel offenlich gehenkt an disen brief an dem tag vnd in dem jar, als vorgeschriben stad.