Ich^a Peter Payger, den man nempt Riht an, tun kunt vnd vergich offenlich mit disem brief allen, die in sehent lesent oder horent||
lesen, alz mich die ersamen wisen der burgermaister der rat vnd die burger ze sant Gallen gehainmot gestraft vnd in iro||
vanknuss vnd banden hatten vmb das ich mich gen in vnd ir aidgnossen vber sehen vnd mit fraueler red wider si getan hatt||
anders dann ich tun solt, won aber mich die selben der burgermaister vnd der rat ze sant Gallen vor an durch got von erber lut bet wegen vss iro vanknuss vnd banden ledig gelassen hant, darumb so han ich willeklich vnbezwungenlich vngebunden vnd vngefangen gesund libes vnd mutes offenlich gesworn ainen gelerten aide liplich ze got vnd ze den hailigen mit vfgehaltnen vingern, vmb die vorgedahten vanknuss strâff vnd getat der obgenanten des burgermaisters des rates vnd aller burger vnd burgerinen da selbs ze sant Gallen aller iro aidgnossen vnd helffer gemainlich vnd iro ieklichs besunder vnd mit namen aller dero, die an der selben miner vanknuss strâff vnd getat schuld gehebt hant in dehain wise ratent oder helffent darzu gewesen sint hainlich oder offenlich, luter gantz vnd gut frund ze sinne vnd alle min frund inen darumb ze frund ze gewinnen ân furzug vnd ân geuarde vnd die selben vanknuss straff vnd getat niemer ze andenn noch ze aferrenn vnd wider si noch iro aidgnossen niemer me ze sinne noch ze tunne weder mit geriht noch ân geriht mit worten noch mit werken noch in dehain wise noch nieman andre an miner statt noch von minen wegen ân geuarde. Vnd des ze warem vrkunde vnd stater sicherhait aller der vorgeschribenen dinge vnd vergiht so han ich Peter Payger da vorgenant erbetten den beschaidenn Hansen Grubel burger ze sant Gallen, daz er sin insigel fur mich gehenkt hat an disen brief, vnder des insigel ich mich in diser sache willeklich gebunden han, won ich aigens insigels niht han, des och ich obgenanter Hans Grubel mir vnd minen erben ân schaden vergich an disem brief. Der geben ist ze sant Gallen an dem nahsten samstag vor aller hailigen tag in dem jar, do man zalt von Cristus geburt vierzehenhundert jar vnd darnach in dem sibenden jâre.