Wir^a die nachgenanten Wernli Schorli, Vlrich an Stalden vnd Wernli Rissi alle driie von Switz¹ tun kunt vnd veriehent offenlich mit||
disem brief allen, die in sehent oder horent lesen, alz vns die ersamen wisen der burgermaister der rat vnd die burger ze sant||
Gallen gehainmot gestraft vnd in iro vanknuss vnd banden hatten vmb daz wir vns gen in vnd ir aidgnossen vber sehen vnd||
mit fraueler red wider si getan hatten anders dann wir tun solten, won aber vns die selben der burgermaister vnd der rat ze sant Gallen durch vnser frund vnd vnser lantlut von Switz ernstlichen bett willen vss iro vanknuss vnd banden ledig gelassen hant, darumb so haben wir alle driie willeklich vnbezwungenlich vngebunden vnd vngefangen offenlich gesworn gelert aide liplich ze got vnd ze den hailigen mit vf gehabenen vingern, vmb die vorgedahten vanknuss straff vnd getat der obgenanten des burgermaisters des rates vnd aller burger vnd burgerinen da selbs ze sant Gallen aller iro aidgnossen vnd helffer gemainlich vnd iro ieklichs besunder vnd mit namen aller dero, die an der selben vnser vanknuss straff vnd getat schuld gehebt hant in dehain wise ratent oder helffent dar zu gewesen sint hainlich oder offenlich, luter gantz vnd gut frund ze sinne vnd alle vnser frund inen darumb ze frund ze gewinnen ân geuarde vnd ân furzug vnd die selben vanknuss straff vnd getat niemer ze andenn noch ze aferrenn vnd wider si noch ir aidgnossen niemer me ze sinne noch ze tunne weder mit geriht noch ân geriht mit worten noch mit werken noch in dehain wise noch nieman andre an vnser statt noch von vnsern wegen, ân geuarde. Beschach aber, das got niht welle, das vnser lantlut von Switz vnd ir aidgnossen wider su mit offner paner zugint, so ist vns behalten vnd in den aiden vssgelassen, das wir dann wol mit in ziehen mugent. Vnd ich vorgenanter Wernli Schorli han inen hieruber zu mir ze besser sicherhait ze rehten wern geben vnd gesetzt die ersamen min guten frund Vlrichen Amman ab Yberg² vnd Jannin Schorlin baid von Switz, die baid vnuerschaidenlich mit ir truwe in aides wise fur mich gelobt hant, disu rihtung vnd allu vorgeschribenen stuk vnd artikel wâr stat vnd vnwandelber ze haltenn vnd ze vollefurenn ân argelist vnd ân geuarde. Vnd wir obgenanten Vlrich an Stalden vnd Wernli Rissi habent inen och hieruber zu vns ze besser sicherhait ze rehten wern geben vnd gesetzt die ersamen vnser guten frund Vlin zer Frowen, Hainrichen an Stalden vnd Vlrich Engenberg alle driie von Switz, die och alle driie vnuerschaidenlich mit ir truwen in aides wise fur vns gelobt hant, disu rihtung vnd allu vorgeschribenen stuk vnd artikel war stat vnd vnwandelber ze haltenn vnd ze vollefurenn ân arge list vnd ân geuarde. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so han ich Vlrich an Stalden da vorgenant min aigen insigel fur mich gehenkt an disen brief, vnd won wir die obgenanten Wernli Schorli vnd Wernli Rissi aigener insigel niht haben, so haben wir erbetten den erbern Rudolf Lirer burger ze sant Gallen, daz er sin insigel fur vns gehenkt hat an disen brief, vnder des insigel wir vns in diser sach willeklich gebunden haben, des och ich obgenanter Rudolf Lirer mir vnd minen erben ân schaden vergich an disem brief. Darnach veriehent wir die obgenanten wern Vlrich Amman ab Yberg, Janni Schorli, Vli zur Frowen, Hainrich an Stalden vnd Vlrich Engenberg ain gantz warhait aller der dinge, so von vns an disem brief da vorgeschriben stant, vnd ze merer sicherhait der selben dinge so han ich Vlrich Amman ab Yberg da vorgenant och min aigen insigel offenlich gehenkt an disen brief, vnder des insigel wir die obgenanten Janni Schorli, Vli zur Frowen, Hainrich an Stalden vnd Vlrich Engenberg vns willeklich gebunden haben, won wir aigener insigel niht hant, war vnd stat ze lassenn alles, daz von vns da vorgeschriben stant an disem brief. Der geben ist ze sant Gallen an dem nahsten samstag vor aller hailigen tag in dem jar, do man zalt von Cristus geburt vierzehenhundert jar vnd darnach in dem sibenden jare.