Ich^a Cuntzli von Wynenden¹ wilunt wonhaft ze Lindow² tun kunt vnd vergich offenlich mit disem brief allen, die in ansehent oder horent lesen, alz mich die||
ersamen wisen der burgermaister der rat vnd die gemainde der statt ze sant Gallen gehainmot vnd in iro vanknuss vnd banden hattent, vmb||
daz ich mich etwas gen in vber sehen vnd wider su getan hatt anders dann ich tun solt, won aber su mich begnadot hant vnd mich durch des||
edeln wolerbornen mines gnadigen herren her Peters von Hewen³ fryg vnd ritter ernstlichen bett ledig vnd vss der vanknuss gelassen hant, darumb so han ich frilich willeklich vnd vnbezwungenlich vngebunden vnd vngefangen mit guter vorbetrahtung offenlich gesworn liplich zu got vnd zu den hailigen mit vf gehabenen vingern, vmb die vorgedahten vanknuss strâff vnd getat der vorgedahten des burgermaisters des rates vnd aller burger vnd burgerinen gemainlich der statt ze sant Gallen vnd iro ieklichs besunder vnd mit namen aller dero, wer die sint, die an der selben miner vanknuss straff vnd getat schuld gehebt hant hainlich oder offenlich mit raten ald mit getaten ald in dehain wise, luter gantz vnd gut frund ze sinne vnd alle min frund inen darumb ze frund ze gewinnen ân allen furzug vnd die selben vanknuss strâff vnd getat niemer ze andenn noch ze aferrenn weder mit gaistlichem noch mit weltlichem geriht noch ân geriht mit worten noch mit werken noch in kain wise noch nieman andre an miner statt noch von minen wegen ân alle geuarde. Ich han och in den vorgedahten aide genomen vnd gesworn, wider die vorgedahten den burgermaister den rat vnd die burger alle gemainlich noch sunderlich der obgenanten statt ze sant Gallen noch wider dehain iro aidgnossen noch die irn, si gehoren ald sien ietz zu in verbunden ald die her nach zu in verbunden vnd gehoren werdent, niemer me ze komenn noch ze tunne noch schaffen getan werden in dehain wise ân alle geuarde. Hetti oder gewunni ich aber iht zu inen ald zu den, so zu inen gehorent, zu sprechenn, darumb sol ich reht nemen an den stetten vnd in den gerihten, da denn der ansprachig in gehort, ân geuarde. Beschach aber, das got niht welle, daz ich den vorgeschribenn aide iemer uber furi ald ieman von minen wegen an dehainen vorgeschribenn stuken vnd sich das erfundi mit der warhait, so sol ich danne dem burgermaister dem rat vnd gemainer statt ze sant Gallen siben hundert Rinscher guldin alles guter an gold vnd volle swar an gewiht gantzlich verfallen sin ze gebenn ân alle widerrede, vnd han inen vmb die selben siben hundert guldin zu mir ze merer sicherhait ze rehten wern geben vnd gesetzt den vorgenanten minen herren her Petern von Hewen vnd junker Wolflin von Hewen⁴ sinen êlichen bruder, die hant inen baid vnuerschaidenlich gelobt ietwedre mit siner truwe in aides wise, ob das wari, daz ich in des selben gutes vnd guldinen verfieli, alz vor ist beschaiden, daz si danne baid vnuerschaidenlich den selben dem burgermaister dem rat vnd gemainer statt ze sant Gallen die selben siben hundert guter Rinscher guldin geben weren vnd rihten sont ze sant Gallen in der statt fur aht fur bann fur krieg fur aller manglichs heften entweren vnd verbieten vnd ân allen ir schaden vnd in och gebunden sin sont, die selben guldin gantzlich ze gebenn vnd vszerihtenn bi der ersten vordrung ân allen furzug vnd widerrede. War aber, daz ich ald die obgenanten wern inen die selben guldin danne niht rihtint gantzlich vnd gar ân allen furzug, so hant die selben der burgermaister der rat vnd die burger gemainlich der statt ze sant Gallen vnd iro helffer, wer vnd wie vil ir sint, friies vrlob vnd vollen gewalt darnach, wenn su wellen, daz su mich vnd och die obgenanten wern vnd vnser aller erben darumb pfenden noten heften vnd angriffen sont vnd mugent an luten vnd an gutern in stetten in dorffern vff dem lande vnd wa si es erlangen vnd begriffen mugent mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su daz getun mugent ald in fugklich ist, vnd sont da mit niht gefrafelt han alz vil vnd alz dik, vntz das si derselben sibenhundert guter Rinscher guldin vnd dez schaden, in den si vnd iro helffer von des selben phendens notens heftens vnd an griffens wegen koment, gantzlich gewert vnd vsgeriht werdent. Vber diz alles han ich vorgenanter Cuntzli mich des willeklich gebunden, also wari, da vor got sie, daz ich ald ieman von minen wegen die vorgeschribenn vanknuss straff vnd getat iemer andoti oder aferti in dehain wise vnd den vorgeschribenen aide iemer uber sach vnd uber furi mit dehainen sachen, wenn oder wa daz beschach, daz danne der burgermaister der rat vnd die burger alle gemainlich der statt ze sant Gallen vnd iro ieklicher besunder vnd alle iro helffer mich an griffen hainmen vnd vahen sont vnd mugent ân alles reht ân klag vnd ân zorn vff dem land in stetten in dorffern ald wa su mich dann an komen vnd ergriffen mugent, vnd daz su mich danne fur ainen schadlichen verschulten vertailten verzalten man verderben vnd von dem lib tun sont vnd mugent ân alles reht vnd ân vrtail, vnd sol mich noch die obgenanten wern noch vnser erben noch dehain vnser lut noch guter hie vor noch hie wider niht schirmen noch gut sin weder babstlichs kungklichs noch kayserlichs geriht gewalt gelait gesetzt gnâd noch frihait kain acht noch banne kain lantfrid buntnust noch geselleschaft kain burgreht kain gewonhait kain fund noch gesetzt, so ietz ist oder her nach iemer funden gesetzt oder von ieman erdaht wurd, noch enkainer lay ander sache behelf noch furzug. Ich vorgenanter Cuntzli von Wynenden han mich och mit namen verzigen aller helf aller gnâden alles vszugs alles schirmes vnd alles des, da mit ich mich wider diz vorgenanten sachen vnd buntnuss iemer gesetzen ald da wider geredan ald gewerben kundi oder mohti in dehain wise. Ich han och in den vorgeschribenen aide genomen vnd gesworn, die obgenanten wern vnd iro erben gantzlich ze losenn vnd vnschadhaft ze machenn, vnd han inen och erlobt, mich vnd min erben darumb an ze griffenn vnd ze pfendenn in aller der wise alz den obgenanten burgern ze sant Gallen, alz vor ist beschaiden, vntz in ir schad gantzlich ab gelait vnd bezalt wirt. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so han ich Cuntzli von Wynenden da vorgenant erbetten den ersamen Georien Blârrer och burger ze sant Gallen, daz er sin insigel fur mich vnd min erben gehenkt hat an disen brief, vnder des insigel ich mich in diser sache willeklich gebunden han, won ich aigens insigels niht han, des och ich obgenanter Geori Blârrer mir vnd minen erben ân schaden vergich an disem brief. Darnach veriehent wir die obgenanten wern her Peter vnd Wolfli von Hewen ain gantz warhait aller der dinge, so von vns an disem brief da vorgeschriben stant, vnd ze besser sicherhait der selben dinge so haben wir och baid fur vns vnd vnser erben vnseru insigel offenlich gehenkt an disen brief. Der geben ist ze sant Gallen an sant Andres abent des hailigen zwelfbotten in dem jar, do man zalt von Cristus geburt vierzehenhundert jâr vnd darnach in dem sibenden jare.