Ich^a Cuny Bruwiler von Ober Arnanng¹ bekenn offembar vnd tun kunt mengklich mit disem brieue, das ich uon dem frommen vnd vesten jungkher Hansen||
uon Ainwil² vogt zu Arbon³ an barem gelt ingenommen vnd empfangen hon funf pfund pfening guter Costentzer werung, dero ich gentzlich uon||
im betzalt bin nach minem guten benugen, darumb mit wolbedachtem synne vnd mut, wie das yetz vnd hienach zu ewigen ziten uor||
allermengklich vnd allenthalben gantz kraft hat haben sol vnd mag, dem uorgenanten jungkher Hansen uon Ainwil vnd allen sinen erben vnd nachkommen ainsz staten vesten ewigen vnd ymmer werenden koufs recht vnd redlich zu koffent geben hab vnd gib ymme yetz wissentlich mit disem brieue zway viertal gutz subers wolberaitz kernes Bischofzeller⁴ mesz statz jarlichz vnd ewigz zinsz vnd vszgendz gutz von vsser uorusz vnd ab minem gut zu Oberarnang gelegen, das uormalz Hansen Vlys saligen gewesen ist, das ainhalb stosset an Niderarnnanger⁵ vnd an Ainwiler guter ouch an Annruti⁶ vnd an Reckenhub⁷, vnd vsz allen sinen rechten nutzen fruchten gewonhaiten vnd zugehorungen daran gantz nutz hindangesetzt, vnd das alles, wie yetz begriffen ist, hab ich dem egenanten jungkher Hansen uon Ainwil vnd sinen erben vmb hobtgut zinsz vnd sonder vmb alles dz, so diser brief vszwiset, zu ainem rechten vnderpfand verschriben vnd ingesetzt fur ledig vnd darab och uormalz niemannt nutz gat denn demselben jungkher Hansen uon Ainwil vnd dasselb gut ich vnd min erben hinfuro in guten eren haben vnd damit kain endrung nit mer tun sollen noch mugen weder mit versetzen verkoffen noch mit dehainer tailung noch mit dehainen andern dingen, das dem selben jungkher Hansen uon Ainwile vnd sinen erben an iren rechten schaden bring kains wagz, also vnd mit der beschaidenhait, das ich vnd all min erben vnd nachkommen dem egenanten jungkher Hansen uon Ainwil sinen erben ald nachkommen die uorgemelten zway viertal kernengeltz vszgendz gutz nunhinenthin ymmer ewigklich vnd jarlichz allwegen vff sant Martins tag vnd nemlich vff nu den nechstkunftigen sant Martins tag mit dem ersten zinsz anzufanhent tugenlich richten weren betzalen vnd ouch gen Byschoffzell in die statt zu iren sichern handen antwurten sollen yegklichz jars on all mindrung vnd abgang vnd sond fur mengklichz hefften vnd verbieten vnd gentzlich on allen iren schaden. Welhis jars aber ich min erben ald nachkomen daran sumig waren vnd inen sollichen zinsz nit vszrichten vff zil an die statt vnd inmasz, als uor stat, so hat der obgenant jungkher Hans uon Ainwil ouch all sin erben vnd helffer gantz macht vnd uollen gewalt, das sy das uorberurt vnderpfand mit allen sinen zugehorungen vnd rechten darumb woll mugen angriffen vnd das alles versetzen vnd verkouffen fur varende verrechtuertigote vnd verstandne pfand ob sy wellent mit gericht ald one gericht ymmer als uil vnd gnug, vntz sy vmm ain yegklichen iren geuallen vszstendigen zinse vnd och daby vmb allen costen vnd schaden, den sy hieuon empfangen hand, es sy uon clag zerunng sumsaly brieuen bottenlon nachraisen gerichten gaistlichen oder weltlichen oder uon andern sachen, wie ald inwelhen wag sich sollicher schad gefugti, gentzlich mit ainander vszgericht betzalt vnd gantz vnclagbar gemacht worden sind on allen iren costen vnd schaden, vnd was inen ye denn jarlichen an sollichem irem vnderpfand abgat vnd hinderstellig belibet wenig oder uil, daruff sollen ich vnd min erben mit allen andern vnsern guten ligenden vnd varenden recht weren sin fur all irrung swynug vnd bekunbernusz nach lantzrecht vngeuarlichen, also das mich noch min erben dauor gar nutz schirmen noch bedeken sol dehain fryhait burgerrecht lantzrecht noch sust gantz nutz anders vberal in kain wag. Vnd des alles zu warem offem vrkund vnd vestung so hon ich obgenanter Cuny Bruwiler mit vlysz erbetten den frommen vnd vesten jungkher Hansen uon Adlikon⁸ zu Bischofzell gesassen, das er sin aigen insigel fur mich vnd all min erben doch im vnd sinen erben one schaden offenlich gehengkt hat an disen brieue. Der geben ist an fritag uor sant Jorigen tag des hailigen ritters nach Cristi geburt thusent vierhundert vnd darnach im achtenden jaure.