Ich^a Cunrat Musler hofamman ze sant Gallen¹ tun kunt vnd vergich offenlich mit disem brief allen, die in sehent lesent oder horent lesen, das fur mich kam ze||
sant Gallen an dem tag, alz dirre brief geben ist, der beschaiden Vlrich Atzler vnd offnot vnd veriach da offenlich vor mir fur sich fur alle sin erben vnd nachkomen||
vnd sprach, das er mit wolbedahtem mut vnd guter vorbetrahtung ain phunt phenning alles guter vnd genamer Costentzer munse jarliches zins vnd ewiges geltes||
von dem vnd vsser dem gut gelegen bi der statt ze sant Gallen, daz sin lehen war von dem erwirdigen gotzhus ze sant Gallen vnd ainhalb stosset an Hansen Ruschen gut vnd anderthalb an das Hatterna², ab allem vnd vsser allem dem, so zu dem selben gut ald darin gehort, es sie hus hof stadel aker wisen wasen waiden gebom zwi holtz ald veld gebuwens ald vngebuwens genemptz ald vngenemptz wissentz oder vnwissentz nut vsgenomen, redlich vnd reht aines staten ewiges koffes verkoft vnd ze koffenn geben hetti dem ersamen Hansen Straiffen von Birbomli³ burger ze sant Gallen vnd sinen erben, ob er enwar, vmb ainlolf phunt phenning guter vnd genamer Costentzer munse, dero er gantzlich vnd gar von im gewert war vnd enphangen hett vnd an sinen offenn nutz bewendet, vnd gab och do ze stett der selb vorgenant Vlrich Atzler mit siner hand das vorgeschriben ain phunt phenning guter vnd genamer Costentzer munse jarliches zins vnd ewiges geltes von dem ab dem vnd vsser dem vorgeschribenn gut vnd was darzu ald darin gehort, mit allen rehten willeklich frilich reht vnd redlich vf an min hand vnd batt mich es lihen ze lehen dem obgenanten Hansen Straiffen. Do erhort ich sin ernstlich bet vnd lech das vorgeschriben ain phunt phenning guter Costentzer munse jarliches zins vnd ewiges geltes von dem vnd vsser dem vorgeschribenen gut vnd waz darzu ald darin gehort mit allen rehten vnd lich es mit disem brief dem obgenanten Hansen Straiffen ze lehen, doch minem herren abt Cunen abt des vorgeschribenen gotzhus ze sant Gallen⁴ vnd dem selben gotzhus ze sant Gallen an allen iren rehten vnd gewonhaiten gantzlich vnschadlich vnd sunderlich mit solicher beschaidenhait vnd in den rehten dinge vnd gedinge, das der obgenant Vlrich Atzler vnd alle sin erben vnd nachkomen, in dero hand vnd gewalt das vorgeschriben gut iemer kumpt inne hant oder niessent, dem obgenanten Hansen Straiffen vnd allen sinen erben vnd nachkomen hinnanhin aller jarlich ie vff sant Gallen tag ain phunt phenning guter vnd genamer Costentzer munse oder ander lay munse da fur, die ie danne ze sant Gallen in der statt den meren tail geng vnd genam ist, ân geuarde von dem ab dem vnd vsser dem vorgeschribenn sinem gut vnd waz darzu ald darin gehort ze rehtem jarlichem zins ân furzug ân alle minrung ân allen abgang vnd ân allen iren schaden geben rihten vnd antwurten sont ze sant Gallen in der statt fur âcht fur bann fur krieg fur aller manglichs entweren heften vnd verbieten. Welhes jares su aber das niht tatint, so hat der obgenant Hans Straiff vnd sin erben vnd nachkomen vnd iro helffer, wer vnd wie vil ir sint, friies vrlob vnd vollen gewalt, ie nach sant Gallen tag, wenne su wellent, den obgenanten Vlrich Atzler vnd sin erben vnd nachkomen, in dero hand vnd gewalt daz vorgeschriben sin gut ie danne ist inne hant oder niessent, ze pfendenn ze notenn ze heften vnd an ze griffenn an iro gut ligendem vnd varendem vff dem land vnd in den stetten vff dem vorgeschribenn gut vnd anderswa, wa si es begriffen vnd erlangen mugent, mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su das getun mugent ald in fugklich ist, vber alle frihait buntnuss ainung gnâd vnd gewonhait alz vil vnd alz dik, vntz das su ie des selben zins, der in ie danne da von vssgestanden vnd niht worden war, vnd och des schaden, in den su vnd iro helffer von des selben phendens notens heftens vnd angriffens wegen koment, gantzlich gewert vnd vsgeriht werdent, vnd sol su noch iro erben noch nachkomen noch dehain iro ligent noch varent gut hie vor noch hie wider niht schirmen friien noch gut sin enkainer lay sach behelf noch furzug, so ieman vinden vsziehen oder erdenken kan in dehain wise. Vnd lobt och do der vorgenant Vlrich Atzler mit siner truwe vnd lobet mit disem brief fur sich vnd alle sin erben, des vorgeschribenn aines phunt phennings jarliches zins vnd ewiges geltes von dem vnd vsser dem vorgeschribenn gut vnd des koffes reht wer ze sinne nach des landes reht vnd och den obgenanten Hansen Straiffen vnd sin erben darumb ze versprechenn vnd ze verstanne an allen stetten an allen gerihten gen aller manglichem ân allen iren schaden, wenne wa vnd wie dik su des bedurffent ald darumb von ieman angesprochen geschadgot oder vfgetriben werdent mit dem rehten. Vnd des alles ze offem warem vrkunde guter zugnuss aller der vorgeschribenen dinge vnd vergiht so han ich Cunrat Musler hofamman da vorgenant von der lehenschaft wegen min insigel offenlich gehenkt an disen brief. Darnach vergich ich der obgenant Vlrich Atzler ain gantz warhait aller der dinge, so von mir an disem brief da vor geschriben stant, vnd ze besser stater sicherhait der selben dinge so han ich erbetten den wolbeschaidenn Vlrich ab dem Berg den smit burger ze sant Gallen, daz er sin insigel fur mich fur alle min erben vnd nachkomen gehenkt hat an disen brief, vnder des insigel ich mich in diser sache willeklich gebunden han, won ich aigens insigels niht han, des och ich obgenanter Vlrich ab dem Berg mir vnd minen erben ân schaden vergich an disem brief. Der geben ist ze sant Gallen an dem nahsten samstag vor sant Georien tag in dem jar, do man zalt von Cristus geburt vierzehenhundert jar vnd darnach in dem ahtenden jâre.