Wir^a graff Fridrich von Toggenburg¹ grauff ze Brettengow² vnd ze Thavasz³ etc. verjehend vnd tund||
kunt mengclichem mit disem brieff, das wir erindert sind worden vnd uerstanden habent, wie die luttkilch vnd kilchspelLsatz ze Magelsperg⁴ mit aller ir zugehord ze rechter aigenschafft gewesen sy des erwirdigen gotzhusz ze sant Johann im Turtal||
sant Benedictus ordens in Costentzer bistum gelegen, vnd dz ouch die obgnant kilch vnd kilchensatz dem jetzgnemptem gotzhusz an der herren tisch gehortt hab vnd dem selben tisch ingelipt vnd gewidmott, die selb kilch mit aller ir zugehord vor langen zitten, dz des kain angedenknust von luten nitt enist, an vnser vordren herrschafft vnd graffschafft komen ist ze Toggenburg vnd sy mit aller zugehortt bisz her vff disen huttigen tag an vnsz komen ist, vssgenoment den widmen der obgnanten kilchen, den noch dz obgnant gotzhusz inngehebt hatt. Habent^b wir angesehen gott, der vor allen dingen vor ougen ze habent ist, Marien sin reinenn mutter vnser vnd vnseren vordren sel hail vnd dz gottes dienst allweg gemerott werd mit singen vnd mit lesen, vnd habent fur vnsz vnser erben vnd nachkomen die obgenanten kilchen ze Magelsperg mit kilchensatz mit zehenden jungen vnd grossem mit aller aigenschafft herrschafft lehenschafft vnd manschafften mit allen nutzen vnd gewonhaitten mit allen rechten vnd gesetzten vnd mit aller iren zugehord geben lutterlich durch gott vnd in vrkund disz brieffs vnserm andachtigen in gott abt Rudolffen⁵ des obgnanten gotzhusz vnd gemainem gotzhusz vnd cappittel inen vnd ir nachkomen ewenclich an den tisch vnd setzend dz obgenant gotzhusz hutt bi tag in gentzlich hablich aigenschafft herrschafft gwalt vnd gewer vnd verhaissent fur vns vnser erben vnd nachkomen, dz obgenant gotzhusz ze sant Joh(anⁿ an diser vnser gaistlichen gotzgab niemer me ze bekrenken oder ze kumbern in kain wisz vnd besunder in vnserm schirm ze halten, dz sy dester furo gott fur vnsz bitten syend. Des ze gantzer warhaitt ewiger statter sicherhaitt habent wir vnser aigen insigel fur vnsz vnser erben vnd nachkomen offenlich gehengd an disen brieff. Der geben ist ze Liechtenstaig⁶ in vnser statt in dem jar, do man zalt nach Cristi geburt vierzehen hundert jar, darnach im achten jar, an dem nachsten donstag vor dem mayen tag, ind. prima.