Wir^a Ruprecht von gots gnaden Romischer kunig zu allen ziten merer des richs bekennen vnd tun kunt||
offenbar mit diesem briefe allen den, die yn ansehent oder horent lesen, als vnsere lieben getruwen amman||
vnd lantlute des dals zu Appenzelle³ vnd yre eidgenoszen, die uff die zijt zu yn verbunden waren, dem hochLgepornen Friederich hertzogen zu Osterrich⁴ etc. vnserm lieben sone vnd fursten diese nachgeschrieben vesten mit namen Jagberg⁵, Welschen Ramszwag⁶, Veltkilch⁷, Dosters⁸, die alte Montfurt⁹ vnd Rynecke¹⁰ angewunnen vnd die auch zurbrochen hant, vnd in der sune, die wir nehst zu Costentz gemacht han, nemlich begriffen ist, waz die vorgenanten Appenzeller vnd yre eidgenoszen vesten gewunnen vnd zurbrochen hant, das derselben zurbrochen vesten nummer kein widder gebuwet solle werden, es sij dann, das wir daz in vnsern offen versiegelten briefen erlauben werden. Des haben wir dem obgenanten vnserm sone hertzog Friederich gegunnet vnd erleubet gunnen vnd erleuben yme in crafft dissz brieffs, die vorgenanten vesten widder zu buwen vnd zu machen, als yn dann duncket yme vnd der herschafft von Osterrich bequemnlich vnd nutzlich sin. Orkund dissz brieffs versiegelt mit vnser kuniglicher maiestat anhangendem ingesiegel. Geben zu Heidelberg¹¹ nach Cristi gepurte viertzehenhundert jare vnd darnach in dem achten jare uff sant Philipps vnd Jacobs der heiligen zwolff bodten tag vnsers richs in dem achten jare.