Ich^a Walti Kachelstetter von sant Gallen vergich offenlich an disem brief vnd tun kunt allermanglich, alz mich da||
die ersamen vnd wisen der burgermaister vnd der raut der statt ze Rauenspurg¹ in ir vanknusz von||
ettwz lunden vnd clag wegen, so vff mich gieng, in ir vanknusz braucht hatten, der selben vanknusz aber||
si mich von iren gnauden vnd ouch von bett wegen der ersamen vnd wisen dez burgermaisters vnd dez rautz ze sant Gallen ledig gelassen hand mit der beschaidenhait, dz ich die selben vanknusz noch dehain sach, die sich von der selben vanknusz wegen verloffen hând, weder gen den vorgenanten von Rauenspurg noch gen iren burgern noch gen dehainen den iren numerme geaffern gerechen nôch melden sol nôch schaffen getân werden in kain weg ân all geuard, vnd darvmb so hân ouch ich vorgenanter Walti Kachelstetter geswôrn ain gelerten aid liplich ze got vnd den hailigen, dz alles, so hie vor geschriben staut, ze halten getruwlich vnd ân all geuard. War aber, dz ich daz immer uberfur, dauor got sig, so sol ich denn dannenthin ain mainaider rechtloser vertailter man haissen vnd sin an allen stetten, wa man mich denn ankômen vnd ergriffen mag. Darzu ze noch besser sicherhait so hân ich den vorgenanten von Rauenspurg zu mir ze rechten geweren gesetzt min lieb bruder Hainin, Vlin, Cuntz aber Hainin vnd Vlin alle funf von sant Gallen also vnd mit der beschaidenhait, war dz ich vorgenanter Walti Kachelstetter dz, so hie vorgeschriben staut, dehains wegs vberfur, wz schaden denn die vorgenanten von Rauenspurg oder dehain die iren davon namen oder emphiengen, wie oder von welhen sachen sich dz fugte, den selben schaden allen sullen denn wir ietzgenanten geweren den vorgenanten von Rauenspurg vnd allen den iren uszrichten vnd si gantzlich vnclagbar machen âne allen iren schaden vnd dennocht zu dem allem, ob dz war, dz der vorgenant Walti Kachelstetter vnser bruder also uberfur, dz got nit well, so sullen wir denn dem selben vnserm bruder nauchstellen ze haimen ze glicher wis alz die von Rauenspurg selb, ân all gevard. Vnd dez alles, so hie uor von vns funf geweren geschriben staut, haben wir funf geweren geswôrn liplich ze got vnd den hailigen, das ze halten, so von vns geschriben staut, getrulich vnd ân all geuard. Vnd des ze urkund so haben wir alle sechs erbetten die ersamen fursichtigen vnd wisen den burgermaister vnd der raut ze sant Gallen, dz si ir statt secret insigel in vnd ir statt vnd allen ir nâchkômen vnschadlich fur vns offenlich gehenkt hand an disen brief. Der geben ist an zinstag nach dez hailigen crutz tag, alz es funden ward, nauch Cristi geburt vierzehenhundert jaur vnd darnauch in dem achtenden jaur.