Wir^a Fridreich von gots gnaden hertzog ze Osterreich¹ ze Steyr ze Kernden vnd ze Krain graf ze Tyrol etc. tun kunt, daz||
fur vns kamen die erbern wisen vnser lieben getrewen der amman der rat vnd die burger gemainleich vnserr stat||
ze Rynegg² vnd baten vns, daz wir in vnd irer stat geruchten ze bestetten vnd ze vernewen all ire recht freyhait brief||
vnd gute gewonhait, die sy von kaysern kunigen vnd nemleich von den durleuchtigen fursten weilunt kunig Rudolfen vnd kunig Albrechten vnd darnach von kayser Ludweigen vnd kayser Karln vnd von andern herren, ee sy zu vnsern handen komen waren, hietten, da haben wir an gesehen der egenanten vnserr burger flissigen bet vnd haben in all ire recht gnad freyhait brief, die sy von den egenanten fursten kaysern kunigen vnd herren habent, vnd gut gewonhait, die sy vntz auf disen heutigen tag herbracht habent, von newen dingen bestet vnd vernewet bestetten vnd vernewen in auch wissentleich mit dem brief, also daz sy vnd ir nachkomen furbasser bey denselben iren rechten gnaden freyhaiten briefen vnd guten gewonhaiten an menikleichs irrung vnd hindernuss beleiben vnd der^b niessen sullent in aller der masse, als sy die bisher genossen vnd herbracht habent, an geuerde. Dauon emphelhen wir vnsern lieben getrewen allen vnsern lantvogten grafen freyen herren rittern vnd knechten phlegern purggrauen burgermeistern schultheissen vnd reten in allen vnsern steten vnd auch andern vnsern amptleuten vnd vndertanen, den diser brief getzaygt wirdt, vnd wellen auch ernstleich, daz sy die egenanten vnser burger von Rynegg bey den vorgenanten iren rechten freyhaiten briefen gnaden vnd guten gewonhaiten beleiben lassen vnd sy auch von vnsern wegen dabey vestikleich halten vnd schirmen vnd in dawider nyemand dhainen gewalt noch vnrecht tun lassen in dhain wege, wan das ist gentzleich vnser maynung. Mit vrkund ditz briefs. Geben ze Rotenburg am Nekher³ an freytag vor dem suntag Cantate nach ostern nach Crists gepurd in dem viertzehen hundertistem vnd dem achtden jare.