Wir^a Rudolff von gots gnâden abt vnd gemainer conuent des gotzhuss ze sant Johann im Turtal¹ in||
Costentzer bistum gelegen bekennen mit disem brief fur vns vnd fur all vnd ieklich vnser nachkomen,||
das wir mit guter vorbetrahtung ainhelklich durch besser vnd komlicher vnser vnd des egenanten vnsers gotzhus||
nutzze willen ainen wechsel getân haben mit dem erwirdigen gaistlichen fursten vnd herren hern Cunen abt vnd mit gemainem cappitel des erwirdigen gotzhûss ze sant Gallen², vnd haben dem selben gotzhus ze sant Gallen gewechselt vnd gegeben den erbern Hansen Waibel von Ramisperg³ Cuntzlis Waibels von Ramisperg elichen sun, der vnser vnd vnsers gotzhus was vnd dem zugehort von aigenschafft wegen. Vnd haben das getân mit der bedingd vnd in dem rehten, das derselb Hans Waibel nu hinnenhin iemer ewenklich ân vnser vnd vnser nâchkomen vnd ân menglichs von vnsren wegen sumen vnd ierren gehort vnd gehoren sol mit sinem lib vnd gut mit vall mit gelass mit diensten mit vndertanikaiten vnd mit allen gewonhaiten zugehorden vnd rehten, so wir ald vnser nachkomen ald ieman von vnsren wegen zu im haben oder gehaben soltint oder mohtint bi sinem leben oder nach sinem tod, an das vnd zu dem obgenanten gotzhus ze sant Gallen. Vnd ist vns hervmb vnd da fur gewechselt vnd gegeben Bertschi Hutzli von Stetten⁴, der des egenanten gotzhuss ze sant Gallen was vnd dem zugehorta von aigenschafft wegen. Vnd hervmb so haben wir vns begeben entwaltiget vnd enzigen begeben entwaltigent vnd enzihen vns och krefftenklich mit disem brief fur vns fur vnser nachkomen aller aigenschafft lehenschafft besatzung kuntschafft brief gewer frihait gnad vrkund vszug inuall vordrung vnd ansprâch gaistlichs vnd och weltlichs gerihtes vnd rehten, von dero wegen ald da mit wir ald vnser nachkomen ald ieman andre an vnser statt ald von vnsren wegen das egenant gotzhus ze sant Gallen ald ieman von desselben gotzhuses wegen kunden soltin oder mohtin angeraichen bekumberen angesprechen geschadgen oder vfgetriben nv ald hernach von reht ald von gewonhait von dehainerlay vordrung ansprâch oder rehten wegen, so wir ald vnser nachkomen ald ieman von vnsren wegen ietz haben oder hernach iemer haben oder gewinnen soltin oder mohtint zu des vorgenanten Hansen Waibels lib ald gut bi sinem leben oder nach sinem tod von dehainerlay obgeschribner oder andrer sachen gewonhaiten oder rehten wegen, die sigint genamt oder vngenamt. Vnd ist dis alles durch besser vnd komlicher vnser vnd des obgenanten vnsers gotzhuss sachen vnd nutzze also angesehen gehandelt vnd volfurt mit behugten worten vnd getaten, als es nv vnd hernach ewenklich krafft vnd maht haben sol vnd mag nach dem rehten, vnd haben hervber ze ewiger sicherhait aller vorgeschribner ding vnd bedingd disen brief versigelten gegeben fur vns vnd fur alle vnser nâchkomen mit vnser des obgenanten abt Rudolffs vnd mit des egenanten conuentes des gotzhuss ze sant Johann im Turtal anhangenden insigeln. Geben vnd beschehen ze sant Johann im Turtal in vnserm gotzhus am nahsten samstag nach vnsers herren fronlichams tag im jar, do man zalt von gottes geburt tusent vierhundert vnd aht jare.