Wir die nachgenempten Petter von Hewen ritter vnd Wolfram von Hewen¹ gebruder baid frye heren veriehent vnd tund kunt allermenklichem mit disem briff fur vns vnd vnser erben vnd nachkomen, das wir an barem gelt nach vnserm nutz vnd willen gantzlich ingenomen hand vnd enpfangen habint von dem ersamen Johansen Bischoff dem alten burger ze Wil² drissig pfund pfenning gutter vnd genemer Costentzer muns, vnd habent im vnd allen sinen erben dar vmb wissenklich vnd wolbedach fur vns vnd alle vnser erben vnd alle vnser nachkomen ains vngevorlichen ewigen koffs ze koffen geben achtzehen schilling pfenning Costentzer muns jarlichs zins, die selben achtzehen schilling pfennig vns vntzhar gangen sint vnd jarlich gan soltent ab von vns vsser dem hoff zem obren Wille³ gelegen mit aller zu gehort, der hoff des egesaitten Bischoffs ist, vnd ab von vnd vsser dem hoff zem nidren Wille⁴ gelegen mit aller zu gehord zwelf schilling pfenning Costentzer muns jarlichs zins, die selben zwelf schilling vns vntz har gangen sind vsser dem hoff zem nidren Wille, die selben zwen hoff obren Wille vnd nidren Wille des Bischoffs vnd ob Rikenbach⁵ dem dorf gelegen sint, vnd ab von vnd vsser ainer hub ze Rikenbach in dem dorff gelegen mitt aller zu gehord, die der Just ietz buwt, vierzehen schilling pfennig Costentzer muns vnd zway firtel haber Wiler mess och jarlich zins vnd geltz, so vns vntz har gangen sind dar vss vnd gân soltent. Vnd habent im vnd sinen erben die selben achtzehen schilling pfenning Costentzer, die selben zwelf schilling pfenning Costentzer vnd die virzen schilling pfenning Costentzer vnd die zwai virtel haber jarlichs geltz mitt allen fryhaitten rechten vnd zu gehordten, als wir vnd vnser vordren dz vntz har von vnd vsser den obgenanten zwain hofen vnd der hub ingenomen vnd genossen habint, ledklich vnd frilich vffgeben vnd fur vnuerkumbret mit vnser baider handen getatt gunst vnd gutten willen mit aller gewarsaimi worten vnd werken, so dar zu nach des landes recht sitten vnd gewonhait gehortent, zu des obgenampten Johansen Bischoffs vnd siner erben handen bracht vnd geverget vnd sy des in liplich nutzlich gewaltsami vnd gewer gesetzt, also dz enweder wir noch vnser erben nach nachckomen noch nimen ander von vnser wegen de hain recht vordrung noch ansprach dar zu nimer mer gehaben noch gewinen soltent enweder mit recht noch an recht noch in dehain wis, so imem erdenken kan, an geverd. Vnd haben vns hier vber gegen dem selben Johansen Bischoff vnd gegen allen sinen erben ledklich vnd frilich fur vns vnd vnser erben vnd nachkomen verzigen vnd entwert vnd verzihent vnd entwerent vns redlich vnd recht mit disem briff aller aigen schaft aller lechenschaft aller manschaft aller gewer aller kuntschaft aller zugnust lut rodel vnd brifen alles rechten aller rechtung vordrung vnd ansprach, so wir ald vnser erben ald nachkomen ald iman ander von vnser wegen zu dem selben pfenning vnd haberen jarlichen gelt allem oder dehainem sunder ie gehatten ald gehaben mochten in dehain wis ald weg, so iman erdenken kan, an geverd. Wir sollent vnd lobent och vestenklich mit disem briff fur vns vnd vnser erben vnd nachkomen, des obgenanten pfenning vnd haberen gelt jarliches zins vsgendes ab von vnd vsser den egenanten zwain hofen vnd der hub mit aller zugehord fur recht vnuerkumbret gut vnd dis redlichen ewigen koffs in aller vorgeschriben wis vnd bedingnust des obgenanten Hansen Bischofs vnd siner erben gen aller menklichem allenthalben, wenn wa vnd wie dik sy des notdurftig sind ald mit dem rechten dar vmb bekumbert ald angesprochen werdent, recht weren ze sinde nacht dem rechten vnd nacht des landes recht sytten vnd gewonhaitten vff vnsern kosten vnd gantzlich ane schaden des egenanten Hansen Bischoffs vnd siner erben an geverde. Vnd namlich mit dem gedinge, war ob sich hienacht, es sye vber kurtz oder vber lang, imer erfunde, dz das pfenning vnd habern gelt von iman, war der wer, pfand ald lechen warint, dz wir vnd vnser erben vnd nachkomen sy denne dem obgenanten Hansen Bischoff vnd sinen erben nach iro vordrung inwendig vir wochen den nachsten nach enander ane furzug vnd wider red vertgen vnd an allen iren schaden versorgen sond, wie inen geratten wirt, dz sy wol dar an habent syent, an geverd. Vnd war aber, ob wir vnd vnser erben vnd nachkomen dz nitt also tattint, wie sy des denne dar nach in dehain wis ald weg ze schaden koment, daz wir vnser erben vnd vnser nachkomen sy dar vmb gantzlich entschaggen sollent an wider red, vnd daz sy vnd ir helfer, wer die sint, vollen gewalt vnd recht hand vnd haben sond, vns vnd vnser erben vnd vnser vnd ire gutter ligende vnd varende vnd alle vnser lutt dar vmb anzegriffend ze notend vnd ze pfendent mit welerlay gerichten sy went vnd an recht, als lang vntz daz si dar mit gentzlich entschadgot werdent, vnd sol vns vnd vnser erben vnd nachkomen noch vnser lut noch gutter dar vor dehainer lay sach noch gerich gelich nutz schirmen an geverd. Des ze warem offem vrkund so haben wir baid vnsre insigel fur vnd^a vnd vnser erben vnd nachkomen offenlich gehenkt an disen briff. Der geben ist ze Wil in der statt an dem nechsten cinstag vor sant Johansen tag des Toffers ze sunwendi nach Cristi geburt virzehen hunder jar vnd dar nach in dem achtenden jare.