Ich^a Elisabeth Dietrichin Hansen Dietrichs von Lindow¹ burgers ze Waldsew² elichi frow hern Jorijen des Truchsassen von Ringingen³ ritters gesessen ze Buningen⁴ elichi tohter bekenn fur||
mich vnd fur alle min erben vnd nachkomen mit disem brief, das mir der ietzgenamt Hans Dietrich min elicher wirt mit handen mit verhengde vnd mit gutem willen des hoherwirdigen||
ffursten vnd herren hern Cunen⁵ abbte vnd der herren des capitels gemainlich des erwirdigen gotzhuses ze sant Gallen miner gnadiger herren versetzet vnd in pfandes wîs ze minen handen||
brâht hât fur die widerlegung miner hainstur dis nachgeschriben jarlich gelt vnd nutzze an pfenningen an habern an hunren vnd an ayern ab vnd vsser den nachgeschribnen gutern ffur sehshundert sehs vnd sehzig pfund alles guter vnd Iteliger haller, die geng vnd gab sigint, oder aber der munsse, die ie danne geng vnd gab ist vnd da mit ain koffman den andern souil geltes vngeforlich geweren vnd bezalen mag ze Costentz in der statt oder ze sant Gallen in der statt, ob haller vnwerd ald abgesetzt wurdint, das alles och demselben Hansen Dietrichen minem elichen wirt also versetzt vnd sin pfand was von dem obgenanten abt Cunen vnd gemainem capitel des obgenanten gotzhuss ze sant Gallen. Vnd hervmb sond och wissen alle vnd ieklich ietzig vnd kunfftig, die disen brief sehent oder horent lesen, das in dirre versatzung beredt vnd namlich bedinget ist, welhes jares, es sig vber kurtz ald vber lange zit, der obgenant abt Cun oder sin nachkomen vnd das capitel des obgenanten gotzhuses ze sant Gallen oder iro gewiss botten ald furwesen mich oder min erben, ob ich enwar, ald min nachkomen, in dero hand ald gewalt das pfand jarlich gelt vnd nutzze hienachgenamt iemer koment, in welh wîs oder weg sich das ienavon fugtt, ermanent vnd vns verkundent mit botten mit briefen oder muntlich ze hus ze hof ald vnder ogen, das si das wider losen wellint, vnd vns danne desselben jares vff sant Johans tag des Toffers ze sunnwendi oder vor dem selben sant Johans tag ze vnsren oder vnsrer botten handen bezalent ze Costentz oder ze sant Gallen, wedrenthalb si wellent, sehshundert vnd sehsvndsehzig pfund der vorgeschribnen haller vnd werung, so sond wir es tugentlich vnd ân alle widerred infall vnd vszug bi guten truwen enpfahen vnd nemen, vnd sol danne da mit der pfandbrief, so mir daruber versigelt ist, inen widergegeben werden vnd die nachgenamten nutzz vnd jarlich gelte ab vnd vsser den nachgeschribnen gutern an pfenningen an habern an hunren vnd an ayern mit allen iren rehten vnd zugehorden demm obgenanten abt Cunen sinen nachkomen vnd dem gotzhus ze sant Gallen von mir vnd minen erben vnd nachkomen gantzlichen ledig vnd los haissen vnd sin mit vrkund diss briefs. Beschiht aber die losung nach sant Johans tag des Toffers ze sunnwendi, so sol doch das pfande demm obgenanten abt Cunen sinen nachkomen vnd dem capitel des gotzhuses ze sant Gallen dannenhin ledig vnd los haissen vnd sin denne also verr, das doch ich min erben ald nachkomen dennocht desselben jares vnd doch niht lenger noch furbasser das jarlich gelt vnd die nutzze hie nachgenamt mugen innemen vnd haben vngeferlich. Warint aber iedanne ich min erben ald nachkomen ald ieman von vnsren wegen der widerlosung widersatzig oder verzugin das, wie ald von was sachen sich das fugti, das doch got wend, wenne dann der obgenant abt Cun sin nachkomen vnd das capitel des obgenanten gotzhuses ze sant Gallen, die danne sind, ald ir botten oder furwesen darnach legent vnd bezalent sehshundert vnd sehs vnd sehzig pfund der obgenamten haller vnd werung gen Costentz in die munsse oder gen Lindow in die munsse ald gen sant Gallen in die munsse, mir minen erben oder nachkomen da mit gewartig ze sinde, so haissent vnd sind och ich min erben vnd nachkomen des geltes also gewert vnd wol bezalt gar vnd gantzlich vnd haisset vnd ist och da mit min abgeseiter brief, so ich dar uber hab, dannenhin ewenklich tod vnd vnkrefftig vnd dem obgenanten minem herren abt Cunen sinen nachkomenn vnd dem capitel des gotzhuses ze sant Gallen vnschadlich, vnd ist och dem selben abt Cunen sinen nachkomenn vnd dem capitel des egenanten gotzhus ze sant Gallen dannenhin iemer ewklich das jarlich gelt die nutzz vnd das pfand hienachgenamt gar vnd gantzlich ledig vnd los von mir vnd allen minen erben vnd nachkomen ân alle widerred infall vnd vszug, das ist alles luter vnd namlich beredt vnd bedinget fur kunfftig ierrung widerred vnd vszug. Vnd ist dis das jarlich gelt vnd die nutzz vnd guter da vorgedaht. Item des ersten vsser dem kelnhof ze Roggenzell⁶ ain pfund vnd siben schilling pfenning vnd ffunfzehen malter haber Lindower messes, item Hubli ze Roggenzell von sinem gut ân drig pfenning sehs schilling pfenning vnd ain hun vnd siben ayer, item der Salw von Roggenzell von sinem gut vierdhalben schilling pfenning ain hun vnd aht ayer, item Burk der Licher von Roggenzell von sinem gut vier schilling vnd drig pfenning ain hun vnd siben ayer, item Jak Licher ze Roggenzell von sinem gut vier schilling anderhalb hun vnd funf ayer, item Wernli ze Roggenzell von sinem gut ainen vnd zwaintzig pfenning ain hun vnd vier ayer, item die guter ze Riet⁷ vnd die schupuss ze Strodorff⁸, die buwent Claus vnd Rudi von Riet vnd Hans Ffugli ze Riet vnd gebent ain pfund vnd siben schilling pfenning vier malter vnd sehs viertel kornes Lindower messes vier hunr vnd drissig ayer, item vom Regnotz⁹ git von Schadmanswiller¹⁰ vnd vom Regnotz sehsthalben schilling pfenning, item von der Kagnegg¹¹ drizehenthalben schilling pfenning, das buwet Buchschôrr, Haintz Mark, Haintz Schnider, der Beller vnd der Wagner vnd die Fuglin, item die Nider Ruti¹² gilt ahtzehen viertel haber Lindower messes, die buwt Buchschôrr vnd Buchli vnd Hagen, item die guter ze Munchbuch¹³ geltent ain pfund vnd drig schilling pfenning, die buwt der Brunner, Hans Buchli vnd Anna Buchlin, item die guter ze Ruti vnd ze Swartzenbach¹⁴ vnd ze Botliswiller¹⁵ geltent ain pfund vnd drig schilling pfenning, die buwt Jak Mark vnd Rudi Marken sun vnd der Veser, item die gut ze Storenberg¹⁶ vnd ze Brugg vff dem Sumer¹⁷ gelegen geltent ffunfzehen schilling pfenning vnd zehen scheffel Rafenspurger¹⁸ messes, das buwt Claus Hagen selbander, item das gut ze Jussenwiller¹⁹ gilt funfzehen schilling pfenning ain malter haber Wanger²⁰ messes vnd zwai vasnahthunr, dz buwt Haintz Luti, item das gut ze Tagriswiller²¹ gilt drig schilling pfenning zwen scheffel haber Lindower mess vnd ain vasnaht hun, dz buwt der Huber, item des Behems gut ze Tabrehtzwiller²² gilt ain pfund pfenning dru malter vnd funfthalb viertel haber Lindower messes dru hunr vnd dru vnd zwainzig ayer, item ze Tabrehtzwiller der Nidren Reken gut gilt ainloff schilling pfenning zwai malter vnd dru viertel haber Lindower messes zwai hunr vnd funfzehen ayer, dz buwt Hans Hittenwiller, item der Obren Reken gut ze Tabrehtzwiller gilt ainloff schilling pfenning zwai malter vnd dru viertel haber Lindower messes zwai hunr vnd funfzehen ayer, das buwt Hans Hittenwiller, item Bruchli git von sinem gut ze Tabrehtzwiller ainloff schilling pfenning zwai malter vnd dru viertel haber Lindower mess zwai hunr vnd funfzehen ayer, item die hub enent baches gilt sehsthalben schilling pfenning ain malter vnd anderthalb viertel haber Lindower mess ain hun vnd siben ayer, die buwt Haintz Buman, item das gut ze Hittenwiller²³, das Jacli buwt, gilt ain pfund vnd ainen schilling pfenning vnd sehs viertel haber Lindower messes, vnd des Bluwelmans gut ze Hittenwiller gilt ahtzehen schilling pfenning, das buwt er selber, item Wolffoltz gut ze demm Wuflis²⁴ gilt zwen schilling pfenning. Vnd ze waremm offemm vrkund aller vnd ieklicher vorgeschribner ding vnd bedingd han ich obgenamti Elisabeth Dietrichin des obgenamten Hansen Dietrichs elichi wirtinn herr Jorijen des Truchsassen ritters von Ringingen ze Buningen elichi tohter min aigen insigel fur mich vnd fur alle min erben vnd nachkomen offenlich gehenkt an disen brief vnd han darzu ze noch merer gezuknust vnd ze bessrem vrkund erbetten den wisen wolbeschaidnen man Hainrich Fillnitzen den ammann ze Waldsew, das er sin aigen insigel im selb vnd sinen erben vnschadlich och gehenkt hât an disen brief. Geben ze Waldsew am nahsten samstag nach sant Johans tag des Toffers ze sunnwendi im jar, do man zalt von gottes geburt vierzehenhundert jar vnd dârnâch in dem ahtenden jare.