Wir^a diß nachgenanten Hanman Snewlin von Landegk¹ ritter, Henni Snewlin, Lappe Snewlin Bernlappe von Zaringen², Vlrich Buber vnd Frantz von Krotzingen³ edelknehte||
tunt kunt menglichem mit disem briefe von der stosse vnd spenne wegen, so gewesen sint zwuschent Dietrich Snewlin Bernlappen von Bolswiler⁴ einsteils vnd Berhtolt Snewlin||
des andern teils, vnd als Berhtolt Snewlin Dietrichen Snewlin Bernlappen von Bolswiler anlangende vnd ansprechende was, das er ime Gergen, Henni vnd Clewi Kander gebruder||
Greten Gottenhemerin sune sturte vber das, dz si im zugehertent vnd er vogt vnd herre uber su were von des dorffes vnd gerihtes ze Ebringen⁵ wegen, vnd uber dz, das her Vlrich von Horenberg⁶ sin sweher selige die selben lute bi ziten besetzt hette. Dar zu antwurt Dietrich Snewlin Bernlappe obgenant vnd sprach, er entjehe nit, her Vlrich von Horenberg selig hette bi ziten furbraht, das der egenanten Gretten Gottenhemerin kint des gotzhuses von sant Gallen werent, er hette aber nit furbraht, dz er uber die selben personen herre oder vogt were, nv hette er die selben lute langezit in ruwiger gewalt vnd gewer gehaben vnd gesturt hoh vnd nach als ander sin lute, vnd dar vmb so getruwete er ouch, furo da bi ze belibent. Vnd nach allen ergangenen dingen da kament die obgenanten beid partyen der selben stosse vnd spenne vff vns funff zem rehten, also was wir funf oder der merteil vnder vns zem rehten dar vmb erkandent, das su das halten woltent. Vnd also nament wir vns der sache an von ir ernstlicher bette wegen, vnd nach ir beiderteil rede vnd widerrede da erkanden wir alle funf einhelliklich zem rehten, mahte Berhtolt Snewlin kuntlich, da mit vns funfe oder den merteil vnder vns benugte, das er der obgenanten lute nach volgender herre vnd vogt were von des dorffes vnd des gerihtes ze Ebringen wegen, so solte ime Dietrich Snewlin Bernlappe von Bolswiler die lute lassen volgen. Vnd also kam der obgenant Berhtolt Snewlin vff hut fur vns vnd meint sin kuntschafft ze vollefurende, als wir ime erkent hettent, vnd zoh sin kuntschafft vff Clewi Seger, vff Clewi Gasser her Dietrich Snewlins lute, vff Heintzli Thoman der herschafft von Osterrich man, vff Burckart Sperisen Hans Oswalds zem Wiger⁷ man, vff Jeckli Zund den vogt ze Ebringen, uff Cuni Hewer vnd uff Burgi Freßli von Ebringen, die alle siben seitent, das inen kund vnd wissent were, das her Vlrich von Horenberg selig der obgenanten lute vnd ander von sant Gallen lute, die in das dorff vnd sture vnd in das gerihte ze Ebringen gehortent, wo die gesessen werent, nachuolgender vogt vnd herre were, vnd also were ouch Berhtolt Snewlin in der obgenanten lute vnd aller von sant Gallen lut, wa die in Brißgow⁸ gesessen werent, nachuolgender vogt vnd herre von des dorffs vnd gerihtes ze Ebringen wegen. Da erkanden wir die obgenanten funf vnd sprachent zem rehten offenlich, swurent die obgenanten syben des, so Berhtolt Snewlin uff su zuge vnd su geseit hettent, das su denn genug geseit hettent vnd ein gute kuntschafft were. Also swurent su da mit, das su das alle siben tettent frilich williklich vnd vnbezwungenlich vnd nieman ze lieb noch ze leit. Da sprachent die obgenanten personen alle siben, si tettent es frilich willeklich vnd vnbezwungenlich vnd nieman ze lieb noch ze leit, vnd hubent da mit ir hende uff vnd swurent siben gelert eyde gegen got vnd den heligen, das Berhtolt Snewlin uff su zuge vnd su geseit hettent, das wistent su das, das war were, ane alle geuerde. Vnd wand dise dinge also vor vns beschehen sint vnd wir disen ußspruch zem rehten getan hant nach vnser verstentnusse, des ze vrkunde so hant wir vnser ingesigele gehenckt an disen briefe. Der geben ist an sant Margarethen tag des jares, da man zalt von gottes geburte viertzehenhundert vnd aht jare.