Ich^a Rudolff Rugg von Tannegg¹ gesassen ze Ochsenhart² vergich offenlich vnd tun kunt allermenglichem mit disem brief, als die vogtyen ze Bunberg³,||
ze Arlistal⁴ vnd ze Ottwille⁵ min aigen gewesen sint vnd mir vntz har ierlich darvon vogtsturen vnd dienst gangen vnd geschehen||
sint, daz ich da von dem fromen Johansen Mettler von Vischinen⁶ an barem gelt nach minem nutz vnd willen gantzlich ingenomen||
vnd enpfangen han ân ains funftzig pfund pfenning guter vnd genamer Costentzer muns vnd werung, vnd han im vnd allen sinen erben wissentklich vnd wolbedacht fur mich vnd all min erben ains vngeuarlichen ewigen kouffs dar vmb ze kouffen geben dieselben obgenanten vogtyen ze Bunberg, ze Arlistal vnd ze Ottwille mit gericht twingen bannen vogtsturen diensten vogtrecht vordrungen vnd ansprachen, so ich in dehain wis ald weg ald von dehainerlay sach wegen zu vnd uber dieselben vogtyen mit aller zugehort ie gehatt ald gehaben mochti, vnd han im vnd sinen erben dieselben vogtyen gericht twing bann vogtsturen vogtrecht dienst vnd all ander mine recht, so ich dar an ie gehatt, fur mich vnd min erben ledklich vnd frilich fur recht aigen vffgeben vnd zu sinen vnd siner erben handen bracht vnd fur aigen gevertgot vnd sy der vogtyen in liplich nutzlich gewaltsami vnd gewer gesetzt, als recht sitt vnd gewonlich was vnd als daz billich vnd von recht krafft hat vnd haben sol vnd mag ietz vnd hernach, also daz die obgenanten Johans Mettler vnd sin erben dieselben vogtyen gericht twing banne sturen zins dienst vnd gantze vogtrecht ze Bunberg, ze Arlistal vnd ze Ottwille mit aller zugehort ân min vnd miner erben vnd ân allermenglichs von minen wegen sumen ierren vnd ansprechen nit hinnanthin iemmer inne haben nutzen vnd niessen sond vnd mugent, wie sy wend vnd inen ...b) also daz sy mir noch minen erben noch nieman andrem hin fur niemermer dehain vogtstur vogtrecht dienst noch dehain ...b) von denselben vogtyen wegen nit pflichtig noch gebunden sin sond in dehain wis noch weg ân geuard. Vnd han mich ...b) ledklich verzogen vnd entwert alles rechten aller gewer aller zugnust lut rodel vnd briefen vnd aller andren sachen, damit ich oder min erben dieselben vogtyen vogtrecht dienst vnd zins vnd sturen mit aller zugehort gantzlich ald an dehainem tail jemermer kondent ald mochtent angesprechen von vogtye wegen ald sust von dehainerlay andren sach wegen, so ieman erdenken kan, an geuard. Ich sol vnd geloben ouch fur mich vnd fur alle min erben by guten truwen vnd ouch vestenklich mit disem brief, der obgenanten vogtyen vogtsturen gericht twingen bann vnd vogtrecht vnd dis redlichen ewigen kouffs des obgenanten Johansen Mettlers vnd siner erben gen allermenglichem allenthalben, wenne wa vnd wie dik sy des noturfftig sint ald dar an von ieman gesumpt ald bekumbert wurdent, recht weren ze sint nach aigens recht vnd nach dem recht in vnserm kosten vnd ân allen iren schaden ân geuard. Mit vrkund dis briefs, der mit minem aigem insigel fur mich vnd fur alle min erben versigelter geben ist ze Wil⁷ in der statt im Thurgow nach Cristi geburt vierzehenhundert jar vnd dar nach in dem nunden jare an cinstag vor sant Mathtyas tag des hailigen zwelffbotten in dem rebmanot.