Ich^a Hugo Brunner der kaltkessler Friken Brunners salgen êlicher sun burger ze Liehtistaig¹ tun kunt vnd vergich offenlich fur mich vnd fur alle min||
erben mit disem brief allen, die in ansehent oder horent lesen, daz ich lieplich gutlich vnd fruntlich vber ain komen vnd verriht bin gar||
vnd gantzlich mit den ersamen wisen dem burgermaister dem rat vnd den burgern allen gemainlich arm vnd rich der statt ze sant Gallen||
vmb alle die stosse zuspruch misshellung vnd ansprachen, die ich mit inen ald zu inen ie gehebt han vntz her vff disen huttigen tag, alz dirre brief ist geben, ez war von sold von butungen von lon oder von dehainer lay ander sachen oder ansprachen wegen, was daz ist ald wie ez genant oder gehaissen ist, nut vsgenomen noch hindan gesetzt, also das su noch dehain iro erben noch nachkomen mir noch minen erben da von noch bi dehainen andern sachen niht me schuldig sint noch gelten sont noch wider geben. Vnd darumb so lass ich vnd sagen fur mich vnd fur alle min erben die vorgenanten den burgermaister den rat vnd die burger alle gemainlich der statt ze sant Gallen alle iro erben vnd nachkomen von der vorgedahten stoss zuspruch misshellung vnd ansprachen wegen gantzlich vnd aller ding quitt ledig vnd los mit disem brief. Vnd des alles ze offem warem vrkunde so han ich Hugo Brunner da vorgenant erbetten den erbern Hansen Schindler minen ohain och burger ze sant Gallen, daz er sin insigel fur mich vnd min erben gehenkt hat an disen brief, vnder des insigel ich mich in diser sach willeklich gebunden han, won ich aigens insigels niht han, des och ich obgenanter Hans Schindler mir vnd minen erben ân schaden vergich an disem brief. Der geben ist ze sant Gallen an dem nahsten donstag vor vnser frowen tag ze dem arnde in dem jar, do man zalt von Cristus geburt vierzehenhundert jar vnd darnach in dem nunden jare.