Wir^a Cun von gotz gnaden abt des gotzhus ze sant Gallen¹, das an alles mittel zu gehort dem stul ze Rom, tund||
kund vnd veriehent offenlich mit disem brief manglichem, das fur vns kament ze sant Gallen vff vnserm hus die||
beschaidenn erberen lut Vlrich, Els vnd Ann Andres Entziswillers saligen elichen kind burger ze sant Gallen||
mit Walther Kuchimaister burger ze sant Gallen irem erkornen vogt, mit dem si vor vns vff disen huttigen tag, als wir ze geriht offenlich gesessen sigint, bevogtot wurdent, vnd offnotand mit ir vogt vnd fursprechen vor vns offenlich in geriht, wie das si fur sich vnd ir erben dem beschaidenn Johansen Landen von Bischoffzell² vnd Guten siner elichen tohter vnd iren erben reht vnd redlich ze koffenn geben habint dru malter vesan vnd ain malter haber gutz vnd vngeuarlichs Bischoffzeller messes vier herbst hunr vnd hundert ayer jarlichs vnd ewigs geltz ab vnd vsser dem hof Ranwille³, den man nempt der Entziswiller hof vnd von vns vnd vnserm vorgenanten gotzhus ir lehen gewesen sy, vnd gabent do die vorgenanten Vlrich, Els vnd Ann wilent Andres Entziswillers elichen kind mit dem vorgenanten Walther Kuchimaister irem vogt mit vrtail vnd reht, so vor vns in geriht ertailt was, die vorgenanten dru malter vesan ain malter haber des vorgenanten messes vier herbst hunr vnd hundert ayer ab vnd vsser dem vorgenanten hof Ranwille ledklich vff mit iren handen an vnser hand vnd batent vns, die ernstlich ze lihenn dem egenanten Johansen Landen von Bischoffzell burger ze sant Gallen vnd Guten siner elichen tohter ze lehen baiden gemainlich vnd vnuerschaidenlich nach des koff briefs lut vnd sag, den der selb Johans Land darvmb von inen besigelten inne hetti. Darvmb erhortant wir do ir bett nach vrtail, als da vor vns gemainlich ertailt ward, vnd lihent do ze stund vnd lihent mit vrkund diss brieffs wissentlich dem egenanten Johansen Landen Guten siner elichen tohter die vorgeschribnen dru malter vesan vnd ain malter haber des vorgenanten messes vier herbst hunr vnd hundert ayer ab vnd vsser dem vorgenanten hof Ranwille baiden gemainlich vnd vnuerschaidenlich ze lehen nach des koff briefs lut vnd sag, der darvmb dem selben Johansen Landen vnd Guten siner elichen tohter darvber geben ist, was wir inen daran durch reht lihen sont, vnserm gotzhus vnd vns an vnsern rehten vnd gewonhaiten gantzlich vnschadlich. Vnd des ze vrkund geben wir dem obgenanten Johansen Landen vnd Guten siner elichen tohter disen brief mit vrtail hiervber besigelt. Darnach veriehent wir obgenanten Vlrich, Els vnd Ann wilunt Andres Entziswillers saligen elichen kind vnd Walther Kuchimaister iro vogt in dirre sach ain gantz warhait aller vorgenanter dinge, vnd won wir die selben ulrich, Els vnd Ann nit aigner insigel habint, so habent wir gebetten den wisen^b Johansen Heerrn burger ze sant Gallen, dz er fur vns vnd vnser erben sin aigen insigel im vnd sinen erben vnschadlich offenlich gehenkt hat an disen brief. So han ich Walther Kuchimaister och min aigen insigel von der vogtye wegen mit vrtail offenlich gehenkt an disen brief mir vnd minen erben vnschadlich. Geben am nahsten zinstag vor dem haligen pfingstag nach Cristi geburt vierzehenhundert jar, darnach in dem nunden jare.