Wir^a Cun von gotz gnaden abt des gotzhus ze sant Gallen¹, das an alles mittel zu gehort dem stul ze Rom, tund kund||
vnd veriehent offenlich mit disem brief manglichem, das hutt diss tags, als dirr brief geben ist, fur vns kam der wolbeschaiden||
Bartolome Blârrer vnsers gotzhus bûmaister burger ze sant Gallen² mit Albrehten Blarrer sinem vettern burger ze Costentz, vnd offLnatt derselb Bartolome Blarrer vor vns offenlich, wie das Hainrich Blarrer burger ze Costentz, den man nempt zu dem Pflug, des vorgenanten Albreht Blarrers elicher vatter vns bi im vff gesendt hetti an vnser hand den zehenden ze Rumashorn³ grossen vnd klainen vnd die zehenden ze Sumbri⁴, ze Heuenhofen⁵, ze Spitzzenruti⁶ vnd ze Mulibach⁷ mit aller zu gehord, als er die inne gehebt vnd genossen hatt, die von vnserm vorgenanten gotzhus ze sant Gallen vnd vns sin reht lehen gewesen warin, vnd dz er vns bitten solt, die vorgenanten zehenden mit ir zugehorden ze lihenn Albrehten Blarrer sinem elichen sun ze rehtem lehen, vnd zogt vns och darvmb Hainrich Blarrers sines vettern offenn brief ze end der geschrifft mit sinem aigenn insigel besigelt, vnd also gab vns do der vorgenant Bartolome Blarrer in namen vnd an statt Hainrich Blarrers sines vettern die vorgenanten zehenden alle ledklich vff an vnser hand vnd batt vns die ze lihenn dem vorgenanten Albrehten Blarrer des egenanten Hainrichs elichen sun sinem lieben vettern ze rehtem lehen. Darvmb erhortant wir do iro bett vnd lihent dem egenanten Albrehten Blarrer die vorgenempten zehenden alle ze rehtem lehen vnd lihent im och die mit disem brief, was wir im daran durch reht lihen sont, vns vnd vnserm vorgenanten gotzhus an allen vnsern rehten vnd gewonhaiten gantzlich vnschadlich. Vnd des alles ze offnem vnd warem vrkund habent wir vnser insigel offenlich gehenkt an disen brief. Darnach vergih ich Hainrich Blarrer burger ze Costentz da obgenant ain gantz warhait alles des, so von mir an disem brief verschriben stat, vnd ze merer sicherhait der selben ding han ich och min aigen insigel offenlich gehenkt an disen brief. Der geben ist ze sant Gallen an der nahsten mittwuchen nach vnsers herren ffronlichamen tag nach Cristi geburt vierzehenhundert jar darnach in dem nunden jar.