Ich^a Beringer von der Hohen Landenberg¹ von Frowenuelt² vergih vnd tun kund allermenlich mit disem||
brief, als ich den erwirdigen vnd gaistlichen den closterherren vnd dem gemainen capitel des gotzhus||
ze sant Gallen minen gnedigen herren ze dienst vnd mit miner vesti Frowenuelt mit knechten vnd||
mit anderm minem gezug hilffig vnd inen dar mit gewartig gewesen bin in irem krieg, das mir da die selben min herren zwai hundert guldin guter an gold vnd an gewicht nach lieplichem vber komen, so sy mit mir getan hant, fur min dienst vnd sold, den ich dar vmb vmb sy verdienet han, vnd fur allen schaden gantzlich zu minen handen gewert vnd bezalt hant nach minem willen. Vnd darvmb so sagen vnd lass ich die selben min gnedigen herren des gotzhus ze sant Gallen ir nachkomen vnd das selb ir gotzhus vmb den selben minen dienst vnd sold vnd den kosten vnd vmb allen schaden, so ich darvon enphangen han, fur mich vnd min erben vnd alle min nachkomen vnd fur alle min knecht vnd dienst, die zu den selben ziten by mir lagent vnd warent, vnd fur alle iro erben, fur die selben alle ich och versprich vnd trost, gantzlich quit ledig vnd los mit vrkund dis briefs. Sunder och als ich ainen hoptbrief von den selben minen herren versigelten innhan von des selben mines soldes vnd dienstes wegen, den selben minen brief tod vnd vernicht ich och gantzlich mit disem brief, vnd das ich noch kain min erben noch nieman anders den selben brief niemer sollent noch wellent zogen noch daruff dekainer lay schuld noch schaden noch vorwort haben sollent weder mit gericht noch an gericht an geuerd. Vnd des alles ze vrkund vnd stater warhait han ich der obgenant von Landenberg min insigel offenlich gehenkt an disen brief. Der geben ist an sant Johans tag ze sungichten nach Cristus geburt tusent vnd vierhundert jaren vnd darnach in dem nunden jare.