Wir^a Ruprecht von gotes gnaden Romischer kunig zu allen zijten merer des richs bekennen vnd tun kunt offinbar mit disem brieff, das wir haben angesehen||
diemutige vnd redliche bete des erwirdigen Chunen abbtes des gotszhus zu sant Gallen³ sant Benedicten ordens in Costentzer bischtum gelegen||
vnsers lieben fursten vnd andechtigen vnd nemliche dinste vnd truwe, als vns vnd dem heiligen riche derselb Chune in kunfftigen zijten tun soll||
vnd mag. Vnd haben ime dorumb mit wolbedachtem mute mit gutem rate vnd rechter wissen sin vnd sins closters zu sant Gallen regalia werntlicheid herscheffte lehenscheffte manscheffte land lute burge vnd stete mit allen eren rechten nutzen gerichten gutern zinsen vnd zugehorungen, die von vns vnd dem riche zu lehen ruren vnd die er vnd sin gotszhus vorgenant redlichen herbracht haben, als ein Romischer kunig gnediclichen verluhen vnd gereichet vnd verlihen vnd reichen ime die in craft disz briefs von Romischer kuniglicher mechte volkomenheid zu haben zu halten vnd der zu genieszen in aller masze,als sin vorfaren vnd er die herbracht innegehabt besessen vnd der genossen haben, on geuerde. Vnd der obgenant Chune hat auch dieselben regalia werntlicheid herscheffte lehenscheffte manscheffte land lute burge vnd stete mit allen eren rechten nutzen gerichten gutern zinsen vnd zugehorungen von vns als eyme Romischen kunige sime rechten herren recht vnd redelich empfangen vnd vns dauon gehuldet globt vnd gesworn, als gewonlich ist vnd soliche des rychs geistliche prelaten pflichtig sin zu tunde. Wir haben auch ime sinen nachkomen epten vnd dem closter daselbs zu sant Gallen mit wolbedachtem mute vnd rechter wiszen alle ire priuilegia hantfesten vnd brieue, die yn von seliger gedechtnusz Romischen keysern vnd konigen vnsern vorfaren an dem reiche uber ir herscheffte land lute manscheffte lehenscheffte vnd alle ire zugehorunge, die sy redlich herbracht haben, bestetiget beuestet vernuwet vnd confirmieret besteten beuesten vernuwen vnd confirmieren in die mit craft disz briefs in allen iren meynungen puncten synnen vnd artickeln glicher wise, als ob alle soliche brieue von worte zu worte herinne begriffen weren, vnd meynen vnd wollen, das sy dabij vngehindert verliben sollen. Orkund disz briefs versigelt mit vnserr kuniglicher maiestat insigel. Geben zu Heidelberg⁴ nach Crists geburt viertzehenhundert jare vnd dornach in dem nundem jare, an sant Johanns Baptiste tage, vnsers richs in dem nunden jare.