Wir^a nachgenempten Hainrich Krumb gemain man in diser nachgeschriben sache, Vlrich Furer, Vlrich Spiesser, Vlrich Gossler vnd Vlman Schorant schidlut in der||
selben sache alle burger ze sant Gallen veriehin vnd tund kunt allermenglichem mit disem offenn brief, das fur vns kament ze sant Gallen in der statt vff disen||
huttigen tag, als dirre brief ist geben, dis nachgenempten erbern lute Elzbeth Jacob Hinderhusers salgen elichu frôwe burgerin ze Byschoffcell¹ an ainem tail||
vnd Hainrich Mayer von Rônwile² der schmid burger ze sant Gallen ze dem andern tail, vnd kament vnd giengent die selben baid tail mit wolbedahtem mute vnd mit fryem willen vff vns funff aller der stoss misshellung vnd ansprachen, so sy mit enander hattent vnd gehebt hant vntz her uff disen huttigen tage, als dirre brief ist geben, von des gutz vnd erbs wegen aller der gelegner guter, we hienach namlich an disem brief verschriben stand, die Cunrat Kessler der obgenanten Elzbethen Hinderhuserinen elicher bruder salig nach tôde hinder im gelâssen hât. Des ersten der hof, den man nemet Loch³, ain hof genamt Edliswile⁴, der nider hof, ain gut genamt Strâsse⁵, ain gut genamt das Bol⁶, ain gut genamt der Stain⁵ vnd ain malter korngeltz vss des Strolis gut ze Edliswile vnd vmb alle ander sachen, die sy bis her zu enander ze sprechent vnd mit enander ze schikent gehebt hant, es sye genemptz ald vngenemptz wissentz ald vnwissentz besuchtz ald vnbesuchtz, wie sich zwuschen inen baider sidt ersachet hât vnd vffgelôffen ist, vnd gâbent die selben baid tail ir ietweders sunderbar iro truwe in aydes wise, wes wir vns alle funf ald vnder vns der mertail vmb die selben^b vnd misshellung nach iro baider tail kuntschaft klag furlegung red vnd antwurt erkantint vssprachint vnd sy darvmb gen enander hiessint, daz sy dz vff baid sidt stat halten volfuren vnd tun woltin vnd soltin vnd sy noch nieman von iro wegen noch an iro statt da wider niemer komen tun noch schaffen getân werden weder mit worten noch mit werken mit raten mit getaten haimlich noch offenlich in kain wis luterlich ân alle geuerde. Vnd nach iro baider tail klag furlegung kuntschaft red vnd antwurt, so wir uff baid sidt aigenlich verstanden ingenomen vnd verhort habint, so habin wir vns alle funf ainmutklich erkent sagin vnd sprechin vs, won die stoss vnd widersatz zwuschen nachwendigen frunden gewesen sint. Des ersten dz sy vff baid sidt vmb alle vorgedaht stoss misshellung vnd ansprachen, die sy vntz her vff disen huttigen tag mit enander gehebt hant, gantzlich vnd gar verriht sin sont vnd furbas enander truw vnd fruntschaft halten vnd erzaigen sont luterlich ân alle geuerde. Wir habin vns da by erkent vnd die vorgenanten Elzbethen Hinderhuserinen gehaissen, das sy dem vorgenanten Hainrichen Mayer durch fruntschaft vnd von kains rehten wegen geben vnd zu sinen handen bringen sol das vorgeschriben gut genamt der Stain mit aller zugehorde vnd darzu sehs pfunt pfenning Costentzer muns, vnd sol im das selbe gelt vsrihten vnd bezaln dru pfunt vff sant Pelayen tag vnd dru pfunt vff sant Gallen tag die nachsten kunftig nach disem tag, als dirre brief ist geben. Och sagin wir sprechin vs, das der vorgenant Hainrich Mayer noch sin erben noch nieman an iro statt noch von iro wegen die obgenanten Elzbethen Hinderhuserinen noch ir erben an den vorgeschriben gutern allen gemainlich noch an dehainem sunderlich vss gelâssen das gut genamt der Stain nun hinnenhin nit furbas sumen ierren noch sy vmb dehainerlay vergangen stoss noch sachen ansprechen vftriben bekumberren noch in kain wis beswarren sont weder mit gaistlichem noch weltlichem geriht noch ân reht noch mit dehainen andren sachen ân geuerde vntz an anvallendu erb, daran sont im vnd sinen erben iru reht vsbedingot vnd behalten sin vngeuarlich. Wir habin vns ôch erkent sagin vnd sprechin vs, dewedre tail dis vnsers vsspruchs brief mutet vnd begert, das wir die mit vnser aller insigeln versigelt geben sollen. Vnd ze offemm wârem vrkund vnd gantzer sicherhait dirre vorgenanten dinge vnd vergicht so gebin wir alle funf disen brief hieruber gevestnot vnd versigelten mit vnser aller funfen anhangenden insigeln, doch vns vnd vnsern erben ân schaden. Geben vnd gesprochen an sant Benedictus abent in dem howet des jares, do man zalt von Cristus geburt vierzehenhundert jar, darnach in dem nunden jare.