Allen den, die disen brieff ansehent lesent oder horend lesen, kundent wir die nachbenempten Hans vnd Vlrich die Bollen gebruder, Cunrat Gefug, Anna sin eliche frow, Hans Hoffstetter von Riettli¹, Burk von Riettli, Agnesa sin eliche wip, Gret Hansen Kurtzers seligen von Appentzell² eliche tochter, Jutzi Klein Vlis seligen wilent eliche frow, Vlrich Moser, Anna sin eliche frow, Adelheit Hans Geppensteiners seligen wilent eliche frow vnd Vlrich Vassler fur mich vnd alle mine eliche geschwistrit, das wir alle gemeinlich vnd vnuerscheidenlich mit wolbedachtem mut vnd mit eimberem willen den hoff ze Riettli, der des spitals des heilgen geistes ze sant Gallen³ in der statt recht lehen ist von dem erwirdigen gotzhus ze sant Gallen, mit allen rechten nutzen vnd gewonheiten vnd mit aller zugehord an allein die zwey Norder⁴, die Hans Akrer, Adelheit sin eliche frow, Cunrat in der Ow⁵, Herman Oswald, Adelheit Cunrat Schedlers eliche frow vnd Anna ir eliche tochter, die si hat bi Vlrich Kernen seligen, vmb einen zins hand von dem egenanten spital vns vnd allen vnsern erben frowen als mannen tochtren als knaben ze einem rechten staten walderbzinslehen vmb einen staten zins recht vnd redlich enpfangen habend von den ersamen Lienhart Peyer, Vlrich Furer vnd Rudolff Vorster pfleger vnd meister des obgenampten spitales mit solicher bescheidenheit vnd gedinge, das wir vnd alle vnser erben, ob wir ensind, den selben hoff ze Riettli mit allen rechten vnd mit aller zugehord, als vor ist bescheiden, mit der zimberren mit holtzern vnd mit allen andren dingen in eren vnd vnwustlich haben vnd niessen sond, vnd sullend den obgenanten pflegern vnd meistern vnd allen iren nachkomen vnd dem egenanten spital davon allerjerlich je ze sant Gallen tag acht pfund pfenning guter vnd genemer Costentzer muntz oder anderley muntz dafur, die je denn ze sant Gallen in der statt den meren teil geng vnd genem ist an geuerd, viervndzweintzig herbsthunr zwen kloben werkes zwelff ristig geben vnd richten an furzug vnd an aller der obgenanten pfleger ir nachkomen vnd des egenanten spitals schaden, vnd darzu sullen wir vnd vnser erben den egenampten pflegern vnd iren nachkomen vnd dem obgenanten spital aller jerlichen je cze dem helgen abend ze orstran hundert vnd sechszig eyer alles ze rechtem jerlichem zins geben vnd die richten ze sant Gallen tag. Welhes jares aber wir das nit tetint, so hand die obgenempten pfleger vnd meister vnd alle iro nachkomen vnd der egenempt spital vnd ir helffer, wer die sind, fryes vrlob vnd vollen gewalt, nach jetwedrem der vorgeschribnen zilen, wenn si wellent, vns vnd vnser erben vnd nachkomen ze pfenden ze noten ze hefften vnd anzegriffen an vnserm gut ligendem vnd varendem vff dem land vnd in den stetten mit geistlichem vnd mit weltlichem gericht vnd an gericht an klag vnd an zorn, wie vnd wa vnd wahin si das getun mugend ald in fuglich ist, als vil vnd als dik, vntz das si je des selben zinses, der in denne da von vsgestanden vnd nicht worden were, vnd ouch des schaden, in den si vnd iro nachkomen vnd der egenempt spital vnd iro helfer von desselben pfendens notens hefftens vnd angriffens wegen koment, gantzlich vnd gar gewert werdent. Beschech ouch, das inen vnd dem selben spital deheines jares der vorgeschriben zins gentzlich oder in deheinen teil vssgestundi, vntz das ein zins den andren begriffe vnd erluffi, welhes jares das beschech, so sol den obgenanten pflegern vnd meystern oder iren nachkomen vnd dem egenempten spital der vorgeschriben hoff ze Rietli mit allen rechten vnd mit aller zugehord recht zinsuellig vnd ledig vnd los sin gentzlich vnd gar, also das si vnd ir nachkomen vnd der egenempt spital denselben hoff ze Riettli dannenhin mit aller zugehord besetzen vnd ensetzen sond vnd mugend, mit wem si wellent, vnd damit tun, was dem obgenanten spital fuglich vnd nutzlich ist, vnd sullend wir noch vnser erben, ob wir ensind, noch nieman anders von vnser wegen sy noch iro nachkomen noch den egenempten spital daran nit sumen noch irren mit worten noch mit werken mit gericht noch an gericht noch mit enkeinerley ander sach an geuerd. Darzu so hand die obgenanten pfleger vnd iro nachkomen vnd der obgenant spital och gewalt vnd fryes vrlob, vns vnd vnser erben ze pfenden ze noten ze hefften ze glicher wis vnd in allen den rechten, als da vorgeschriben statt, vntz das der egenant spital desselben zinses, der im denn da von vssgestanden vnd nit worden were, vnd ouch des schaden, in den si vnd ir helffer von desselben pfendens vnd notens wegen koment, gentzlich vnd gar gewert werdent. Wir habend ouch vns selber vnd vnser erben, ob wir ensind, an dem vorgeschribnen walderbzins lehen vsbedinget vnd behalten alle die recht vnd gewonheit, die wir von des vorgeschribnen hoffes wegen ze Rietli bis her gehebt habend an den holtzern in den vorgeschriben zwein Nordern, ze haben vnd ze niessen an alle geuerd, als wir si bis her gehebt vnd genossen hand an geuerde. Beschech ouch, das deheines vnder vns oder vnsern erben, ob wir enwerind, deheines jares von sinen rechten des vorgeschribnen walderbzins lehens gan vnd die verkouffen woltind, es werind frowen oder man, das sol dieselben sine recht den andren teilgenossen des ersten veil bieten vnd vor mengklichem ze koffen geben funff schilling pfenning guter Costentzer muntz neher vnd bas denn ieman anders, ob si die kouffen wellent. Wer aber, das si die nit kouffen woltint ald mochtind, so mag es dannenhin die selben sine recht wol ze kouffen geben, wem es wil, vnd sullent si dem denn, es sig frow oder man, dieselben sine recht lihen ze gelicher wis vnd in allen den rechten dinge vnd gedinge, als es dasselb, dz denne sine recht verkouffet hatt vnd vormals von in genossen vnd gehebt haut, doch mit namen sond die obgenanten pfleger noch iro nachkomen noch der egenempt spital den vorgeschribnen hoff ze Riettli keinen eignen luten, es syend man oder frowen knaben oder tochtran, nit lihen noch daran kein recht haben nach kouff nach tode noch in kein ander wise, doch sol inen je die denn enpfangen hand zwey hunr ze erschatz geben. Welhes ouch vnder vns oder vnsern erben, ob wir ensind, an sinem teil des vorgeschribnen zinses deheines jares sumig wer vnd den nit richti ze den zilen vnd tagen, als vor ist bescheiden, das sol von sinem rechten sin desselben hoffs vnd walderbzinslehens, vnd mugen sich denn die andern teilgenossen des selben sines teils vnd recht vnderziehen vnd die haben vnd niessen in allem dem zins vnd rechten, als er es vormals gehebt vnd genossen hat. Es ist ouch mit namen bedinget vnd beredt, beschech das wir alle gemeinlich oder vnser erben, ob wir enwerint, deheines jares von vnsern rechten des vorgeschribnen walderbzinslehens gan vnd die verkoffen woltind, das wir si denn den obgenanten pflegern oder iren nachkomen vnd dem egenanten spital des ersten veil bieten vnd vor menklichem ze kouffen geben sond funff schilling pfenning guter Costentzer muntz neher vnd bas denn jeman anders, ob si die kouffen wellend. Were aber, das si dieselben vnseri recht nit woltind kouffen noch mochtind, so mugen wir dieselben vnseri recht dannenhin wol ze kouffen geben, wem wir wellen, doch inen vnd iren nachkomen vnd dem egenanten spital an allen iren rechten gentzlich vnschedlich. Des alles ze warem vrkund guter gezugnuss vnd stater sicherheit aller vorgeschribnen ding vnd vergicht so haben wir die vorgenanten lut gemeinlich erbetten die bescheidnen Vlrich ab dem Berg vnd Walther Kuchimeister burger ze sant Gallen, das si beid ir insigel fur vns vnd vnser erben gehenkt hand an disen brieff, vnder dero insigel wir vns in diser sach willenklich gebunden haben, won wir eigner insigel nit hand, des ouch wir die obgenanten Vlrich ab dem Berg vnd Walther Kuchimeister vns vnd vnsern erben an schaden verjehend an disem brieff. Der geben ist ze sant Gallen an dem nechsten mentag vor sant Laurentzien tag in dem jar, do man zalt von Cristus geburt viertzechen hundert jar vnd dar nach in dem nunden jare.