Allen^a den, die disen brief ansehent oder horent lesen, kund ich Claus Lang von Marpach¹ vss dem Rintal vnd vergich offenlich an disem brief fur mich vnd||
alle min erben, das ich mit guter vorbetrahtunge vnd mit wolbedahtem mute von miner redlicher not wegen ainen akker gelegen ze Marpach stôsset||
ainhalb an Hainis Langen akker andrunthalb an des spitâls akker von sant Gallen² vnd ze der dritten sidten an Hirscher tobel³, der min lehen geLwesen ist von dem erwirdigen gotzhus ze sant Gallen, mit stok mit stain mit stegen mit wegen mit grunt mit grât vnd allen rehten vnd zugehorden aines staten ewigen iemerwerenden kôffes redlich vnd reht verkôffet vnd ze kôffent geben hân den ersamen wisen Lienharten Payer, Vlrichen Furer vnd Rudolffen Vorster ze disen ziten pfleger vnd besorger des vorgedahten spitâls des hailigen gaistes ze sant Gallen vnd iren nachkomen, ob sy enwarint, zu des selben spitâls handen vmb vierdhalb pfunt guter Costentzer pfenning, dero ich gar vnd gantzlich nach allem minem willen von inen vsgeriht vnd bezalt worden bin vnd die an minen offenn nutzz komen sint vnd bewendet an den stetten, da ich minen wachssenden schaden mit verkomen hân. Ich han ôch den obgenamten pflegern des vorgeschriben spitâls den vorgedahten akker mit aller zugehorde vfgeben geuertgot vnd zu des selben spitâls handen brâht, wie reht sitte vnd gewonlich ist vnd als es billich vnd nach dem rehten sol vnd mag han ietz vnd hienach, vnd hân mich ôch verzigen vnd verzih mich in kraft dis briefs fur mich vnd min erben wilklich vnd frilich des vorgeschriben akkers mit aller zugehorde aller aigenschaft aller lehenschaft aller kuntschaft aller zugnust vnd gewer lut vnd brief alles rehten gaistlichs vnd weltlichs gerihtes aller vordrung vnd ansprachen aller reht vnd rehtung, so ich ald min erben an dem zu dem vnd von des vorgeschriben akkers wegen noch zu kainer siner zugehorde vntz her uff disen huttigen tag, als dirre brief ist geben, ie gehebt habin ald noch furbz in kunftigen ziten iemer gehaben oder gewinnen mohtin, vnd das ich noch min erben noch nieman an vnser statt noch von vnser wegen die obgenanten pfleger vnd besorger ir nachkomen, ob sy enwarint, noch den obgeschriben spitâl darvmb nit furbas sollent noch wellent ansprechen vftriben bekumberren bekrenken noch in kain wise beswarren weder mit gaistlichem noch weltlichem geriht noch ân geriht noch mit dehainan andren sachen luterlich ân alle geuerde. Ich han ôch gelôpt vnd loben wissentlich mit disem offenn brief fur mich vnd min erben, des vorgeschriben akkers mit aller zugehorde vnd dis kôffes reht weren ze sind nach landes reht vnd die obgenanten pfleger vnd besorger des obgeschriben spitâls vnd iro nachkomen vnd den selben spitâl darvmb ze versprechent vnd ze verstand an allen stetten gen allermenglichem ân allen iren schaden, wenn wa vnd wie dik^b darvmb angesprochen vnd vfgetriben werdent mit dem rehten, ân alle geuerde. Vnd ze offemm wârem vrkund dirre vorgeschriben dinge vnd vergicht so han ich erbetten, won ich nit aigens insigels hân, den erbern Hainrichen Warman burger ze sant Gallen, das er sin insigel im vnd sinen erben ân schaden fur mich vnd min erben an disen brief gehenkt hât. Der geben ward des nachsten donstags nach sant Bartholomeus tag in dem jare, do man zalt von Cristus geburt vierzehenhundert jar, darnach in dem nunden jare.