Ich^a Hans Muller Cunis von Neker¹ êlicher sun tun kunt vnd vergich offenlich mit disem brief allen, die in ansehent oder horent||
lesen, alz mich die fromen wisen der burgermaister der rat vnd die burger gemainlich der statt ze sant Gallen gehainmot vnd in||
iro vanknuss vnd banden hatten, vmb das ich etwas wider si getan hatt, das ich nut tun solt, won aber su mich begnadet hant||
vnd mich durch erber lut bet wegen ledig vnd vss der vanknuss gelassen hant, darumb so han ich willeklich vnd vnbezwungenlich vngebunden vnd vngefangen mit guter vorbetrahtung offenlich gesworn ainen gelerten aide liplich ze got vnd ze den hailigen mit vf gehabenen vingern, vmb die vorgedahten vanknuss vnd getat der vorgenanten des burgermaisters des rates vnd aller burger vnd burgerinen gemainlich vnd sunderlich der statt ze sant Gallen vnd mit namen aller dero, wer die sint, die an der selben miner vanknuss vnd getat schuld gehebt hant hainlich oder offenlich mit raten oder mit getaten oder in dehain wise, luter gantz vnd gut frund ze sinne vnd alle min frund inen darumb ze frund ze gewinnen ân allen furzug vnd die selben vanknuss vnd getat niemer ze andenn noch ze aferrenn weder mit geriht noch ân geriht mit worten noch mit werken noch in dehain wise noch nieman andre an miner statt noch von minen wegen ân alle geuarde. Vnd han darumb vnd hieruber den obgenanten dem burgermaister dem rat vnd den burgern gemainlich ze sant Gallen zu mir ze merer sicherhait ze rehtem wern geben vnd gesetzt Hansen Wasserfluer von Brunnadren², der diz werschaft mit mir vnuerschaidenlich vff sich genomen vnd gelobt hat, mit solicher beschaidenhait vnd gedinge, wari, da vor got sie, daz ich den vorgeschribenen aide iemer vber furi ald ieman von minen wegen an dehainen vorgeschribenen stuken vnd aber des die obgenanten der burgermaister der rat vnd die burger gemainlich oder dehainer besunder der statt ze sant Gallen ze schaden kamint, wie oder welhen weg sich das fugti, daz ich vnd och der obgenant wer vnd vnser baider erben, ob wir nut warint, den obgenanten den burgermaister den rat vnd die burger gemainlich vnd sunderlich der statt ze sant Gallen von dem selben schaden allem gantzlich vnd gar losen vnd vnschadhaft tun vnd machen sullen vnd wellen ie bi der ersten vordrung ân allen furzug vnd ân alle widerrede, wa aber wir oder vnser baider erben daz niht tatint, so hant die selben obgenanten der burgermaister der rat vnd die burger gemainlich ze sant Gallen vnd iro helffer, wer vnd wie vil ir sint, friies vrlob vnd vollen gewalt, ie nach der ersten vordrung, wenne su wellent, daz su mich vnd och den obgenanten wern vnd vnser baider erben darumb phenden noten heften vnd an griffen sont vnd mugent an vnserm gut ligendem vnd varendem vff dem land in dorffern vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su wellent ald in fugklich ist, alz vil vnd alz dik, vntz in ie iro schad, in den su vnd iro helffer dann davon komen warint, gantzlich vnd volleklich vsgeriht vnd entschadgot werdent, vnd sol mich noch den obgenanten wern noch vnser erben noch dehain vnser ligent noch varent gut hie vor noch hie wider niht schirmen noch gut sin enkainer lay sach behelff noch furzug, so ieman finden vsziehen oder erdenken kan in dehain wise. Ich han och in den vorgeschribenen aide genomen vnd gesworn, dem obgenanten wern vnd sinen erben iren schaden gantzlich ab ze tunne, in den su koment von der vorgenanten werschaft wegen, vnd hant darumb och gewalt, mich vnd min erben an ze griffenn vnd ze notenn ze gelicher wise vnd in den rehten alz die obgenanten burger, vntz in iro schad gantzlich abgelait vnd bezalt wirt. Vnd des alles ze offem warem vrkunde so han ich Hans Muller da vorgenant erbetten die ersamen Hansen Entziswiller vogt³ vnd Hansen Pfister von Gossow⁴ stat amman ze sant Gallen⁵, daz su baid iru insigel fur mich vnd min erben gehenkt hant an disen brief, vnder dero insigel ich mich willeklich gebunden han in diser sache, won ich aigens insigels niht han. Darnach vergich ich der obgenant wer Hans Wasserfluer ain gantz warhait aller der dinge, so von mir an disem brief da vorgeschriben stant, vnd ze merer sicherhait der selben dinge, won ich aigens insigels niht han, so han ich mich och willeklich gebunden vnder der obgenanten des vogtes vnd des statt ammans insigel, war vnd stat ze lassenn alles, daz von mir da vorgeschriben stat an disem brief, des och wir obgenanten der vogt vnd der amman vns vnd vnseren erben ân schaden veriehen an disem brief. Der geben ist ze sant Gallen an dem nahsten mantag nach sant Mychels tag in dem jar, do man zalt von Cristus geburt vierzehenhundert jar vnd darnach in dem nunden jare.