Allen^a den, die disen brief ansehent oder horent lesen, kunden wir dis nachgemepten^b Jakli Muller von Wil¹ vnd||
Johans Suter sin bruder vnd vergechen offenlich mit disem brieff, als der from vest junkher Vlrich von||
Landenberg von Griffense² sesshaft ze Wulflingen³ vogt ze Frowenfeld⁴ mich ietzgenanten Jaklin Muller von ettwas zigs||
wegen, so vber mich gangen was, gefangen vnd vmb ettweuil geltes gebessrott hett, vnd mich aber dar nach der selben vangnust ledig gelassen hett, das ich von derselben sach vnd vangnust wegen gegen demselben junkher Vlrichen von Landenberg vnd allen den sinen vnd gegen allen den, die zu derselben sach vnd vangnust in dehain wis ald weg je ichtz getan geraten ald geholfen hant, ain recht vngeuarlich vrfech fur mich vnd allermenglichen von minen wegen gelopt vnd gesworn han, vnd dz wir egenanten Jakli Muller vnd Hans Suter baid fur vns vnd alle vnser erben vnd fur alle vnser frund vnd gesellen vnd fur allermenglichen von vnser wegen by geswornen aiden gelopt haben, dieselben sach vnd vangnust enweder mit recht noch an recht mit worten noch mit werken noch in dehain ander wis noch weg gegen dem obgenanten junkher Vlrichen von Landenberg noch gegen sinen mitgemaindern noch gegen iren erben noch gegen dehainen den iren in dehain wis noch weg mit recht noch an recht nit ze andent vnd inen gemainlich noch iro dehainen besunder dar vmb niemermer zu zesprechent noch ze bekumbrent an geuard. Des alles ze warem offem vrkund, wan wir denn aigner insigel nit haben, so hant wir baid erbetten den fromen Vlrichen Estrich schulthaissen ze Wil⁵, das er sin insigel fur vns offenlich gehenkt hat an disen brieff, das och ich derselb schultheis also getan han von iro baider bett wegen, doch mir vnd minen erben vnschadlich. Geben ze Wil nach Cristz geburt vierzehenhundert jar, dar nach in dem nunden jar, an dem nachsten zinstag nach aller hailgen tag.