Wir graff Fridrich von Toggenburg¹ graff ze Brettengow² vnd ze Thafas³ tunt kund allermanklichem vnd veriehent||
offenlich mit disem brief, daz fur vns kam ze Liechtistaig⁴ in vnser statt vff den tag vnd in dem jar, als diser brief||
geben ist, der erber knecht Welti von Husen⁵ vnd bracht fur vns, wie das Hans und Vli von Husen sin vettern||
leider nulich von todes wegen abgestorben warin, die selben vorgenanten sin vettern vnd ouch er der selb Welty von vns ze lehen gehept hettin gemainklich den zehenden ze Wittwil⁶ mit aller zugehorde, vnd erzogt ouch da der selb Welti vor vns ainen gantzen versigelten brief mit vnserm aigenen ingsigel an gehenket vnd sprach ouch, daz die vorgeschribenen Hans vnd Vli von Husen fur sich vnd alle ir erben luterlich durch gottes willen durch iro vnd iro vordran selen hail willen geben vnd geordnet hettin an das gotzhus vnd an die kilchen ze Kilchberg⁷ ellu die recht, die su an dem zehenden ze Wittwil ye gehept hettin, vnd also wolt ouch er der obgenant Welti von Husen och elli sini recht an dem selben zehenden ze Wittwil fur sich vnd alle sin erben luterlich durch gottes willen geben an dz vorgenant gotzhus vnd kilchen ze Kilchberg durch siner vnd siner fordren selen haile willen, ob er das an vnsern gnaden gehaben mocht, vnd also batt vns do der vorgenant Welti von Husen flissklich vnd demutiklich, dz wir ellu sini recht an dem obgenanten zehenden ze Wittwil von im vf namen woltin vnd vnsern willen vnd gunst zu allen vorgeschribenen und nachgeschribenen stuken vnd gedingen geben woltin vnd vns ouch aller lehenschaft vnd manschaft an dem dikgenanten zehenden ze Wittwil also verzihen vnd den mit aller zugehord dem vorgenanten gotzhus vnd kilchen beaignotin, also das die selben nutz vnd frucht, so von dem selben zehenden nu hinnenthin jarlich vnd eweklich vallent, soltin getailt vnd jarlich geben werden da hin vnd an die stett, da hin es die vorgenanten Hans vnd Vli sin vettern vnd ouch er der vorgenant Welti geben vnd geordnet hettin vnd als es in dem jarzit buch der vorgenanten kilchen ze Kilchberg geschriben stund, hier inne wir gottes lob vnd ere angesehen haben, vnd habent den vorgenanten Weltin von Husen siner bett gentzlich gewert vnd habent ellu sini recht an dem dikgenanten zehenden von im vf genomen an vnser hand vnd habent vns aller lehenschaft vnd manschaft an dem vorgenanten zehenden ze Wittwil mit aller siner zugehorde verzigen vnd begeben vnd begebent vns des alles in aller vorgeschribener wis zu des vorgenanten gotzhus vnd kilchen handen ze Kilchberg mit vrkund dis briefs. Vnd des alles ze warhait so hant wir graf Fridrich von Toggenburg vnser insigel fur vns vnd vnser erben vnd nachkomen gehenket offenlich an disen brief, der geben ist an sant Andres abent nach Cristy geburt vierzehenhundert vnd nun jar.