Wir Albrechtt von gotts gnaden bischoff ze Costenntz¹ thun khund allermenigklichem mit disem brieff, das fur vnns khomen ist an dem tag, alls diser brieff geben ist, der vest vnnser sonnder lieber vnnd getrewer Cunratt von Stainach² vnnd offnet vor vnns, wie er vnnsers gotzhuß marschalckamptt, das er daher von vnsern vorfarn vnns vnnd vnserm gotzhuße ze rechttem lehen ingehept hat vnnd genossen, dem erbern Hainrichen Schilltarn von Costenntz vnserm lieben ohem ains ewigen khauffs ze khauffen geben hab vmb ain sum geltts, alls die khauffbrieff wysenndt, die darumb geben synnd, vnnd batt also derselbe Cunratt von Stainach, das wir zu dem khauffe vnsern wyllenn vnnd gunst geben, darnauch das selbe marschalckamptt von im an vnnser handt vff nemen vnnd das dem eegenanntten Hainrichen Schilttarn gnedigklich wider vß vnser hanndt lyhenn welttenn. Die bett wir erhortten, wann sy vnns zu erhorenn zimlich duchtte, vnnd haben also den obgenantten khauff bestettet vnnsern willenn vnnd gunst darzu gebenn bestettenn den vnnd geben darzu vnsern willenn vnnd gunst mit macht diß brieffs. Darnauch haben wir dasselbe marschalckampt von dem egenantten Cunratten von Stainach an vnser hannd auffgenomen vnnd das hinwider vß vnser hand dem vorgenantten Hainrichen Schiltarn vnnd seinen erben mit allen seinen rechtten vnnd zugehordenn gelyhen vnnd lyhen inen das in khrafft ditz brieffs, wie wir inen das lyhenn sollenn vnnd mögen nu furbas von vnserm gotzhuse vnnd vns in ze haben ze niessenn vnnd ze besitzen in lehenns wiße nauch lehenns recht an geuerde. Vnnd ist dis vergunsten vffnemen vnnd lehenn, alls vorgeschribenn ist, beschehen vnnd volfurt mit aller der gehugde, die darzu gehört vnnd notturfftig was, doch vnns vnnserm gotzhuse vnnd vnsern nauchkhomen an allen vnsern rechttenn vnnd lehennschafften vnnschedlich. Des zu vrkhund haben wir vnnser bischofflich innsigell offennlich thun henncken an disenn brieff. Der gebenn ist ze Costenntz an zinstag nechst nauch sant Andres tag nauch Kristi geburt thusennt vierhundert vnnd in den neunden jare.