Allen^a dien, dy disen brief ansehend lesend oder horend lesen, tund wir dis nachgenempten kund||
Cuni Hofstetter vnd Adelhaid sin elihi wirtin wilend Cunis Frygen ab dem Gibel¹ elichi tochter||
vnd och Rudi Hofstetter ab dem Hennberg², dz wir mit guter vorbetrachtung vnd von vnser redLlichen not wegen den hof genant an dem Gibel, den wir von dem egedachten wilend Cunin Frygen ererbt haigin, mit zimbri mit hof mit akkern mit wisan mit wasen mit zwy mit holtz mit veld mit wunne mit waid mit stegen mit wegen mit stok mit stain mit wasser mit wasserflussen vnd wassergengen mit allen rechten nutzen vnd gewonhaiten vnd zugehorden, so von recht oder von gewonhait dar zu oder dar in gehort, wie dz genempt oder gehaissen ist oder wirt, recht vnd redlich ains staten vnwiderruflichen kofs verkoft vnd ze koffen geben haigin dien erbern wolbeschaidnen Ernin vnd Eglin Enderlin gebrudern vmb drissig pfund pfenning guter vnd genamer Costentzer muntz, dero wir och gantzlich vnd gar von ynen bezalt vnd gewerot sygin vnd an vnsern offen nutz bewendet sint. Vnd da von so enzihin wir vns mit vrkund disz briefs fur vns vnd fur all vnser erben vnd nachkomen des obgenanten hofs an dem Gibel mit aller zugehorde aller aigenschaft aller kuntschaft aller gewer lut vnd brief alles gaistlichen vnd weltlichen rechtes aller vordrung vnd ansprach aller rechten vnd rechtung, so wir oder vnser erben oder nachkomen an dem zu dem vnd von des vorgeschriben hofs wegen an dem Gibel vnd wz dar zu oder dar in gehort, es syg benempt oder vnbenempt, ie gehept haind oder hie nach iemer mochtin gewunnen han. Wir lobent och by guten truwen fur vns vnd fur all vnser erben oder nachkomen, des vorgeschriben hofs am Gibel mit aller zugehord vnd och des kofs recht war ze sin nach des landes recht vnd die vorgedachten Ernin vnd Eglin dy Enderlin oder ir erben, ob sy enwarin, dar vmb ze versprachen vnd ze verstand an allen stetten, da sy oder ir erben von des gutz wegen mit dem rechten gschadgot oder vf getriben wurdint. Vnd des alles ze offem vrkund vnd merer sicherhait der warhait aller dirr vorgeschriben ding vnd geding, won wir aigens insigels nut haigin, so haigin wir erbetten den wolbeschaiden Hainin Frygen ab dem Landensperg³, dz er sin insigel fur vns vnd fur vnser erben vnd nachkomen all gehenkt hat an disen brief. Ich der ietz genempt Haini Fryg vergich, dz ich dz getan han von iro ernstlicher bett wegen, doch mir vnd minen erben vnschadlich. Dis ist beschahen vnd ist dirr brief geben ze Herisow⁴ in dem dorf des jars, do man zalt von Cristus geburt vierzehen hundert jar, dar nach in dem nunden jare, an sant Niclaus abent des hailigen byschofs.