Ich Yntal Eglin burger zu Costentz tun kund vnd ze wissen mengklich mit disem brief fur mich vnd alle min erben, als die erwirdigen min gnadigen hern her Cun von gottes gnauden apt vnd der conuent gemainlich des gotzhus ze sant Gallen¹ fur sich vnd ir nachkomen mir vnd minen erben aines ewigen kouffes ze kouffent geben hand dis nachgeschribnen jerlichen zins vnd nutz in Vttwiler² kirchhori gelegen, die irem gotzhus zugehorent, das ist des ersten so git Cuni Keller von Wyler³ von sinem gut zehen schilling pfenning, der Berr von Wiler gitt von sinem gut siben schilling minder vier pfenning, des Schniebels gut dry schilling vnd vier pfenning, des Sarris gut git ainliff schilling pfenning vnd vier viertail nuss Costentzer meß, Cuntzli Bumann von Vttwilen vnd Hanns Merstetter da selbund gend vier schilling dry pfenning ain viertail kernen ain viertail nuß des benempten meß, der Vler von Vttwilen git vier schilling vnd dry pfenning ain viertail kernen vnd ain viertail nuß des benempten meß, ab des Vischers gut von Vttwilen funff schilling vier pfenning Costentzer munß zway viertail kernen vnd zway viertail nuß des benempten meß, als der brief wist vnd seit, den ich von den obgenanten minen gnadigen herren darumb versigelt brief innhon. Da hon ich fur mich vnd alle mini erben den vorgenanten minen gnadigen herren iren nachkomen vnd dem benempten gotzhus die fruntschafft vnd gutlichi gethon mit disem offenn brief, das sy die vorbenempten zins vnd nutz von mir vnd minen erben, so ich enwar, wol vnd welhes jaurs sy wellent widerkouffen mugent mit aim vnd funfftzig pfund pfenningen guter Costentzer munß oder anderlay mins, die denn dafur zu Costentz geng vnd gnem ist vnd damit yederman den andern souil geltz vngeuarlich geweren mag ze Costentz vnd dawider nit ze wortt haben sont, doch also das sy den widerkouff mit den benempten ainem vnd funffzig pfund pfenningen der benempten munß von mir oder minen erben, ob ich enwar, tun vnd vns des yetz erzalten geltz gantzlich vnd mitainander weren geben vnd bezalen sollent vor sant Johanns tag des Toffers ze sunnwendi mit dem nutz vnd darnach on nutz, vnd sond den dennenthin die vorbenempten nutz vnd zins gantzlich von mir vnd allen minen erben ledig vnd los sin vnd inen denn den kouffbrief on widerred geben vnd antwurten zu iren handen. Stundi aber mir ald minen erben dehain versessen zins oder nutz, die vns dauor vsgestanden warint, das vns den dartzu vnnser recht gentzlich behalten vnd vns die volgen sollent on mengklich widersprechen. Vrkund der warhait hon ich obgenanter Intal Egli fur mich vnd alle min erben min aigen insigel offennlich gehengkt an disen brief. Der geben ist ze Costentz am donstag nach sant Hylarien tag nach Cristj gepurt vierzehenhundert vnd darnach in dem zehendem jaur.