Wir^a nachgenempten Hug vnd Beringer die Schulmaister elich gebruder burger ze sant Gallen veriehin vnd tun kunt offenlich an disem brief fur||
vns vnd vnser erben allen den, die in ansehent oder horent lesen, das wir mit guter vorbetrahtung vnd mit wolbedahtem mute durch||
vnsers bessers nutzzes willen den hof genamt Vfhofen¹ vnd ainhalb stôsset an Gebertswile² andrunthalb an Tegernôw³ vnd ze der dritten||
sidten an ain gutli, das man nemet das Rudli⁴, der vnser lehen gewesen ist von dem erwirdigen gotzhus ze sant Gallen, mit akkren mit wisen mit gebom mit holtz mit veld mit wunn mit wayden mit stok mit stain mit stegen mit wegen mit wasser mit wasserflussen vnd gengen vnd mit allem dem, so von reht vnd von gewonhait zu dem selben hof vnd darin gehoret, wissentz vnd vnwissentz genemptz vnd vngenemptz gesuchtz vnd vngesuchtz aines staten ewigen kôffes redlich vnd reht verkôffet vnd ze kôffent geben habin dem beschaidnen Hainrichen von Gebertingen⁵ vnd sinen erben, ob er enwar, vmb sehzig pfunt pfenning Costentzer muns, dero wir gantzlich vnd gar vsgeriht vnd bezalt worden syen vnd die an vnsern offenn nutzz komen sint vnd bewendet an den stetten, da wir vnsern grossen schaden mit verkomen habin. Wir habin im ôch den vorgeschriben hof mit aller zugehorde dafur vnd in solichen rehten ze kôffent geben geuertgot vnd zu sinen handen brâht, das niht mer noch anders dauon noch darab gât noch gân sol denn gross vnd klain zehent vnd vsser dem ainen tail des selben hofs, den man nemet der klain hof, allerjarlich ainem custor ze sant Gallen drithalb pfunt pfenning Costentzer muns, doch also welhes jares der klain hof den selben zins niht vsgerihten vnd ertragen mag, so sol man es vsser dem grossen hof vsrihten vnd geben, als dik das ze schulden kunt. Wir habin vns verzigen vnd verzihin vns mit disem brief wilklich vnd frilich reht vnd redlich des vorgeschriben hofs Vfhofen mit aller zugehorde aller aigenschaft aller lehenschaft aller kuntschaft aller zugnust vnd gewer lut vnd brief alles rehten gaistlichs vnd weltlichs gerihtes aller vordrung vnd ansprachen aller reht vnd rehtung, so wir ald vnser erben an dem zu dem vnd von des vorgeschriben hofs wegen noch zu kainer siner zugehorde vntz her uff disen huttigen tag, alz dirre brief ist geben, ie gehebt habin ald noch hinnenhin iemer gehaben oder gewinnen mohtin, vnd das wir noch vnser erben noch nieman von vnser wegen noch an vnser statt den obgenanten Hainrichen Gebertinger noch sin erben noch nachkomen darvmb niemer sollent noch wellent ansprechen vftriben bekumberren bekrenken noch in kain wis beswarren weder mit gaistlichem noch weltlichem geriht noch ân reht noch mit dehainen andren sachen luterlich ân alle geuerde. Wir habin ôch gelôpt vnd lobin mit disem offenn brief fur vns vnd vnser erben, des vorgeschriben hofs mit aller zugehorde vnd des kôffes reht weren ze sind nach landes reht vnd in vnd sin erben darvmb ze versprechent vnd ze verstand an allen stetten gen allermenglichem ân allen iren schaden, wenn wa vnd wie dik sy darvmb angesprochen vnd vfgetriben werdent mit dem rehten, ân geuerde. Vnd ze offemm wârem vrkund vnd gantzer sicherhait dirre vorgeschriben dinge vnd vergicht so habin wir baid vnsru insigel fur vns vnd vnser erben an disen brief gehenket. Der geben ward des nachsten zinstags vor sant Valentis tag in dem jare, do man zalt von Cristus geburt vierzehenhundert vnd zehen jar.