Ich^a Rudolff von Roschach der eltest vnd ich Egly von Roschach¹ der elter sin bruder veriehin offenlich vnd tund kunt menglich mit disem brief,||
als der edel vnd wolgeborn herre grauf Albrecht von Werdenberg der elter herre ze Bludentz² vnsern lieben vatter herr Eglolf seiligen||
von Roschach³ ritter versetzt hett gen Haintzen vnd Kunen den Wermaistern gebruder burger ze Lindow⁴ vmb zwen vnd nuntzig Vngerisch guldin,||
des der selb vnser vatter seilig wir vnd vnsru geswustergit nach im ze swârem schaden komen sind von der selben versatzung vnd des selben schadens wegen, vnd wa der obgenant vnser herre graff Albrecht den obgenanten vnsern vatter seiligen vntz vf hutt disen tag, als dirre brief geben ist, versetzt hett, es sige zu angulten ze weren alder zu burgen mit briefen alder âne brief, wie des der selb vnser vatter wir vnd vnsru geswustergit des schadhaft worden sind, darumb hat vns der obgenant vnser herre graff Albrecht nach erberer luten rat, die wir von baiden siten darzu geben habin, nach vnserm mutten mit sechtzig pfunden pfenningen vf hutt disen tag, als dirre brief geben ist, gnedklich vsgericht vnd vns der nach vnserm nutze vnd fromen bezalt. Vnd darumb so sagen wir beide in vnd sin erben fur vns vnd fur vnsru geswustergit vnd fur vnser aller erben von des selben schadens vnd aller versatzung des obgenanten vnsers vatters mit disem brief quitt ledig vnd los, vnd sond vnd wend wir baide des fur vns vnd vnsru geswustergit vnd fur vnser aller erben des obgenanten vnsers herren gut getruw weren vnd versprecher haissen vnd sin, wa si des notdurftig werdent, ane geuard vnd âne irn schaden. Vnd des alles ze warem vnd offem vrkund vnd stater sicherhait so gib ich obgenanter Rudolf von Roschach der eltest fur mich vnd den obgenanten minen bruder Eglin von Roschach den eltern vnd fur endru vnsru geswustergit vnd fur alle vnser erben dem obgenanten minem herren graf Albrecht vnd sinen erben disen brief daruber geuestnot vnd versigelt mit minem aigen angehenkten insigel, darunder ich obgenanter Egly von Roschach der elter mich fur mich vnd fur minu geswustergit vnd fur vnser erben des obgescribnen alles bind vnd verbunden han, won ich min insigel bi mir nit hân, ze offener vergicht vnd vester sicherhait aller vorgescribner ding. Dis geschach vnd ward dirre brief geben ze Bludentz an sant Valentins abent nach Cristus gepurt viertzenhundert jar, darnach in dem zehenden jar.