Wir^a Albreht von gotz gnaden bischof ze Costentz¹ bekennent vnd tund kunt manglichem||
mit disem brief, als wir vor ettwieuil zites in den kriegen der Appentzeller² nâch rât der fromen||
vesten vnserr gesellschaft von der ritterschaft sant Georien schiltes, darumb daz vnsru statt ze||
Bischofcell³ vnd die gegni daselbs dester in besserm frid belibint vnd die vigint dester minder enthaltnust vnd geligers da gehaben mohtint, etwiemanig hus in vnserr vorstatt ze Byschofcell abbrechen vnd in ettlich korhof in der vorgenanten vnser statt setzen vnd vffrihten hiessent, als ouch daz die ersamen vnser lieben in got die chorherren vnd das capitel der stift ze Byschofcell⁴ durch vnsern willen vnd durch nutz vnd fromen der vorgenanten statt vnd gegni do vergunstent, der selben huser zwai in her Hainrichs Roggwillers des custers, zwai in herr Hansen des Korbers, aines in maister Hansen Gossows korhofen, da sy ietzo inne wonent, vnd zwai in die garten hinder dem kor ze Bischofcell, die da gehorent in das klosterlehen, das ietzo herr Hans Stainegg lutpriester ze Bischofcell hât, vffgeriht vnd gebuwen sind, das vnser maynung nie gewesen ist, daz wir der vorgenanten stift vnd korherren ze Bischofcell vnd iren korhofen dehain ire statuten gewonhaiten fryhaiten oder gnâd in dehainen weg swechern ald ergren wellint. Mer wir wellint inen die selben ir statuten gewonhaiten fryhaiten vnd gnad gantzlich vnd gar, als sy si vntz her gehept genossen vnd herbraht hand, behalten vnd by allen iren kreften beliben lâssen vnd hanthaben ane alle geuarde. War och, das die huser, die, als vor geschriben ist, in die korhof gesetzt sind, ir war aines oder me, als vil ir denn war, wider vss den selben hofen abgebrochen wurdint vnd da abgiengint, wie sich das fugti oder zu weler zit das beschach, es war vber kurtz ald vber lang, so sond die selben hof, vss den die huser also abgebrochen wurdent oder abgiengint, dannanhin eweklich von solichen buwen ledig sin vnd dehain hus me darin gesetzt noch gebuwen werden âne willen vnd gunst der vorgenanten chorherren vnd capitels ze Bischofcell oder dez merren tails vnder in, won sy denn furbasz ewenklich von allen andern buwen vnbekumbert ledig vnd vnbeladen vnd bi allen iren fryhaiten statuten gewonhaiten vnd rehten beliben sond, als sy von alter her komen sind, vngeuârlich. Ouch sond die vorgenanten garten, die an das closterlehen gehorent, nû hinnanhin mitt dehainen andern buwen vber die zwai huser, die ietz darinn gebuwen sind, als vor ist geschriben, niemer me bekumbert noch beladen werden in dehaine wise âne alle geuarde. Vnd des alles ze warem vnd offenn vrkund vnd ewiger sicherhait so habin wir vnser insigel offenlich gehenkt an disen brief. Wir der techan vnd das capitel der obrosten stift ze Costentz gemainlich veriehin ouch, das alles das, so hie vor an disem brief geschriben ist, mitt vnserm guten willen vnd gunst geschehen ist, vnd darumb so habin wir vnsers capitels gemain insigel ze zugnust aller vorgeschr(ibne^r ding offenlich gehenkt an disen brief. Wir die burger gemainlich der obgenanten statt ze Bischofzell bekennint ouch, daz alle vorgenanten stuk mitt vnserm gunst vnd guten willen vollfurt sind, vnd darumb habin wir der selben statt gemain insigel ouch ze zugnust offenlich gehenkt an disen brief. Der geben ist ze Costentz des jars, do man zalt von Cristi geburt tusent vierhundert vnd zehen jar, an dem nahsten frytag vor mitter vasten.