Ich^a Haintzman Kurtzer von Appenzell tun kund allen den, die disen brief ansechent oder horent lesen, vnd vergich och das offenlich mit disem brief, als ich Iohansen||
Eggell von Glarus zu disen zitten amman ze Appenzell lantrecht ze Appenzell abgesait hatt vnd da mit lantrecht zu gemainer lantluten handen vf geben wolt vnd||
in nut mee gehorsam sin wolt vnd dz dem obgenanten amman mit fraflen worten ab sait, dar vmb das ich mit den von sant Gallen gemainer statt ze schaffin wolt||
hân, won mich dunkt, dz mir vngutlich von in beschehen war, do das ain burgermaister vnd gemainer rât ze sant Gallen erindrot wurdent, die fiengent mich der selben tag zitt vnd leiten mich in iren turn in herti band, vntz die ersamen wisen der landamman vnd gemain lantlut ze Appenzell zu mir sâchent vnd nach mir gedâchten vnd von minen wegen wurben mit bett vnd mit andren dingen, wie si mir gehelfen mochten gen den obgenanten burgern ze sant Gallen, vnd ee sy das getun kondint oder mochtin, so hân ich vor der obgenant Curtzer dem vorgedâchten landamman vnd gemainen lantluten ze Appenzell gelopt mit miner truw, dz ich furbz ir lantman sin vnd haisen sol vnd in gehorsam sin in allen sachen vngefârlich alz ain ander ir lantman, vnd han och dz dar nach gesworn, alz ich vs der fangnus komen bin, mit verdachtem mut willenklich vnd vnzwungenlich mit vf gehabnen finger vnd mit gelerten worten gen got vnd zu den hailgen, alles dz ze haltin vngefârlich, alz vor vnd nach dir brief wist. Item ich sol furbz in kunftigen ziten niemer werben noch wil mit raten noch mit taten in dehain wis vf der lantluten schaden, dz gemainem land ze Appenzell oder gemainen lantluten da selbs ir lib oder ir gut schaden bringen mocht, och hân ich mir vor behebt in dem selben aid, das ich furbas zuchen mag, wo ich wil zu iren frunden, ob ich mich nut me begân mocht noch welt ze Appenzell, doch furbas in kunftigen zitten den obgenanten lantluten an schaden, alz der artikel vor an disem brief wist, dz ich vf ir lib noch gut nut stellen sol mit raten noch mit taten. Och hân ich furbz in dem selben aid gesworn, ich byn ze Appenzell oder anderswo, so sol ich den obgenanten lantluten ze Appenzell gehorsam sin in den sachen, alz si och fur mich versprochen hant mit irs gemainen lantz insigel von miner redlichen not wegen, alz sy an mir sâchent in der fangnus gen den vorgedâchten von sant Gallen vnd dz tâten von miner ernstlichen bett wegen vnd miner guten frunden vnd gesellen, wo si mich des ermanent vnd das ze schulden kunt, vber dis alles hân ich der vorgenempt Haintzman Curtzer mich des willenklich verbunden vnd verhaisen bi dem vorgeschribnen aid. Wari, da vor gott si, dz ich den vor genempten aid vber sach ald vber fur in dehainen sachen, wenn oder wa das beschach, das denn ain amman vnd gemain lantlut ze Appenzell vnd ir ietklicher besunder vnd all ir helfer mich angrifen haimen vnd vâchen sônd vnd mugent ân alles recht ân klag vnd ân zorn vf dem land in stetten in dorfern vnd wa si mich denn an koment vnd angrifen mugent, vnd das si mich denn fur ainen schadlichen verschulten vertailten verzalten man verderben vnd von dem lib tun son vnd mugent ân alles recht vnd ân all vrtal, vnd sol mich hie vor noch hie wider nut schirmen noch gut sin weder babstlichs kunglichs noch kaiserlich gericht gewalt gelait gesetzt gnâd noch fryhait kain âcht noch pann kain lantfrid buntnus noch gesellschaft kain burgrecht kain lantrecht kain gewonhait kain fund, so ietz ist ald hie nach iemer funden gesetzt oder von iemen erdâcht wurd, noch kainerlayg ander sachen behelf noch furzug. Ich hân mich ôch mit namen verzigen vnd verzich mich mit vrkund diss briefs aller hilf vnd gnâden alles vszug alles schirms vnd alles des, da mit ich mich wider diss vorgeschriben sachen vnd puntnusse gesetzen vnd da wider gereden oder gewerben kond ald mocht in dehain wis. Vnd ze offem warem vrkund vnd statter sicherhait aller dire vorgenempten dinge vnd vergicht so hân ich vorgenempter Haintzman Curtzer min aigen insigel an disen brief gehenkt, vnd noch furbz ze besser vnd merer sicherhait so hân ich erbetten den erberen wisen Hugen Schulmaister zu disen zitten burgermaister ze sant Gallen, dz er sin aigen insigel ze ainer gezugnus zu dem minem offenlich an disen brief gehenkt hât, des ich der selb Hug Schulmaister offenlich an disen brief vergich mir vnd minen erben ân schaden. Diss beschach vnd ward dir brief geben am nachsten gutemtag in den osterfirtagen in dem jâr, do mann zalt von gotz geburt fierzechen hundert jar, dar nach in dem zechenden jâr.