Allen^a den, die disen brief ansehent oder horent lesen, kund ich Cunrat Heger ain burger ze sant Gallen sesshaft in dem turn ze Rôggwille¹ vnd||
vergich des offenlich an disem gegenwurtigen brief fur mich vnd min erben vnd nachkomen, das ich ansih vnd angesehen han die gnâd||
vnd truwe, so mir die ersamen wisen der burgermaister der rât vnd die burger gemainlich der statt ze sant Gallen dik gutlich||
vnd wilklich getân vnd erzaigt hant vnd noch wol getun vnd erzaigen mugent, vnd besunder daran, das si mich zu dem egenanten turn gefurdert vnd geholffen hant, vnd won ich das erkenn vnd erkent han, darvmb so han ich den obgenanten dem burgermaister dem rât vnd den burgern gemainlich ze sant Gallen vnd iren nachkomen willenklich vnd mit wolbedahtem mute gesworn ainen gelerten ayde liplich ze got vnd ze den hailigen mit vfgehabnen vingern, das ich vnd min erben vnd nachkomen inen mit dem selben turn ze Rôggwille gegen allermenglich getrulich warten sollen vnd wellen ân alle widerred vnd die selben den burgermaister den rât vnd die burger ze sant Gallen gemainlich vnd sunderlich vnd alle iro nachkomen vnd die si dahin sendent in den selben turn vnd darus lâssen sollent ze schimpff ze ernst vnd zu allen iren noten, wenn wie dik vnd welher zit das ain burgermaister vnd ain rât ze sant Gallen wellent vnd es ervordrent muntlich oder mit iro briefen, ân allen furzug vnd widerred vngeuarlich. Vnd ze offemm wârem vrkund vnd vester sicherhait aller vorgeschriben dinge vnd vergicht so han ich der obgenant Cunrat Heger erbetten, won ich nit aigens insigels hân, den erbern wisen Herman Schirmer ôch burger ze sant Gallen, das er sin insigel fur mich vnd min erben vnd nachkomen an disen brief gehenket hât, des ich der selbe Herman Schirmer offenlich an disem brief vergich mir vnd minen erben ân schaden. Geben ze sant Gallen an dem zinstag nach vsgenter osterwochen in dem jare, do man zalt von Cristus geburt vierzehenhundert jar, darnach in dem zehenden jare.