Ich^a Hans Enggwiller burger ze sant Gallen bekenn offenbar mit disem brief fur mich vnd fur alle min erben, dz||
ich verkoffet hab den grund vnd bodem des holtzes vnd gutes genamt Verreren Ruti¹, das da stosset an Hans||
Stokmans Grinda¹ ruti an min holtz vnd an Cunis Lochers von Wyer¹ huse, vnd han den grund vnd bodem des||
selben holtzes vnd gutes mit allen des selben grundes vnd bodems rehten vnd zugehorden, es sig^b ze weg ald ze dehainen andren sachen, fur mich vnd alle min erben vnd nachkomen aines staten ewigen koffes ze koffenn gegeben dem vorgenamten Cunin Locher von Wyer vnd sinen erben, ob er enist, vmb dru pfund pfenning guter Costenzer munsse, vnd bin och des geltes gantzlich bezalt vnd han das bewendet an ander min besser komlicher nutzz. Ich hab och dem selben Cunin Locher den grund vnd bodem da vorgeseit mit iro zugehorden gefertget vnd zu sinen handen braht, als es nv vnd hernach wol krafft vnd maht haben sol vnd mag. Es ist och in dem kôff bedinget vnd beredt, als an disem brief geschriben stât, das ist also. Ich egenamter Hans Enkwiller vnd min erben sollen fugen vnd schaffen ân alle widerred, das das holtze vnd gestud, so vff dem vorgeseiten grund vnd bodem stât, dar ab gehowen vnd gezogen werd vnd das der grund vnd bodem des ledig vnd gelaret sig^c von nv maijen, der schierest kumet, vber ain jâr. Beschahi das niht, was wieuil oder welherlaye holtzes oder gestudes danne derselb Cuni Locher sin erben ald nachkomen nach denselben aim jaren vff demselben grund vnd bodem begriffent, das sond vnd mugent sie inen selber haben ald das geben, wem si wellent, ân min vnd miner erben vnd nachkomen svmen vnd ierren. Ich vorgenamter Hans Enkwiller vnd min erben vnd nachkomen sollen och weg haben winters vnd sumers vber den vorgedahten grund vnd bodem, wie wir des notdurfftig sind, in min holtz vnd vsser minem holtz, das darunder gelegen ist. Der vorgenamt Cuni Locher mag och, die wil er lebet, sin vihe, das er ie danne hat, alles ald wieuil er des wil, in das ietzgeseit min holtz triben vnd es darinne waiden, wenn vnd wiedik er wil. Derselb Cuni Locher sol och, die wil er lebet, ainen hag machen bi Hans Muslers holtz vfhin, doch sol er mir noch minen erben noch nachkomen dehainen schaden tun an holtz in minem vorgeseiten holtz von des hages wegen âne geuerd. Ich vorgenamter Hans Enkwiller vnd min erben, ob ich enwar, sollen och bi guten truwen des grundes vnd bodems da vorgedaht vnd och diss koffes reht weren sin nach des landes reht vnd den vorgenamten Cunin Locher vnd sin erben darvmb ân allen iren schaden verstan vnd versprechen, wenn wa gen wem vnd wiedik si des bedurffent ald darvmb von iemann angesprochen werdent mit dem rehten inwendig dem zil, als diser brief bindet wer ze sinne. Des alles ze warem vrkund han ich vorgenamter Hans Enkwiller erbetten, won ich aigens insigels niht hab, den wolbeschaidnen Hansen Golder waibel ze sant Gallen^d2, das er sin aigen insigel im selber vnd sinen erben vnschadlich fur mich fur min erben vnd nachkomen gehenket hât an disen brief, won ich aigens insigels niht hab. Diser brief ist geben ze sant Gallen an sant Markus âbent des hailgen ewangelisten im jar, do man zalt von Crists geburt vierzehenhundert jar vnd darnach im zehenden jare.