Wir^a grâf Rudolff von Werdenberg¹ veriehin vnd tund kund allermenglichem mit disem offenn brief,||
das wir verrechnotz geltz schuldig syen vnd redlich gelten sollen vnd vnser erben, ob wir enwarint, dem||
erbern Georien Warman von sant Gallen vnd sinen erben, ob er enwar, funf vnd sehtzig pfunt guter||
Costentzer pfenning oder anderlay werung vnd muns dafur, die ze den ziten, so wir im das selbe gelt vsrihtint, ze sant Gallen in der statt geng vnd genam ist, vngeuarlich, die wir im von zerung vnd ôch ain tail von lihentz wegen schuldig worden sint. Das selbe gelt sollen wir oder vnser erben dem selben Georien Warman oder sinen erben vsrihten vnd gantzlich zu iren handen bezaln, wenn oder ze welher zit sy des furbas nit gerâten vnd enbern mugent ald wellent vnd es an vns vordrent. Wa wir ald vnser erben das by iro ersten vordrung das furderlich nit tatint, so hât der vorgenant Geory vnd sin erben vnd iro helffer, wer die sint, vollen gewalt vnd gut reht, nach iro ersten vordrung, wenn sy wellent, vns ze notent ze heftent ze pfendent vnd anzegriffent an allen vnsern luten vnd gutern ligenden vnd varenden in stetten vff burgen in fryhaiten in dorffern vff dem land vnd allenthalb, wa sy die ankomen begriffen vnd erlangen mugent, mit gaistlichem vnd weltlichem geriht vnd ân geriht ân zorn vnd ân klag, wenn wa vnd wohin sy das getun mugent vnd inen fugklich ist, als vil vnd als lang, vntz sy des vorgeschriben hopgutz vnd damit alles des schaden, in den sy von des selben geltz vnd angriffentz wegen komen warint, vsgeriht vnd gantzlich bezalt werdent, vnd sol vns noch vnser erben noch kain vnser lut noch gut dauor noch dawider niht schirmen noch gut sin weder burgreht lantreht fryhait gesetzt ainvng puntnust gesellschaft kain gaistlich noch weltlich geriht noch niht anders, so ieman ietz ald in kunftigen ziten vsgeziehen kan ald mag. Sy hant ôch furbz gewalt vnd fryes vrlob nach iro ersten vordrung, wenn sy wellent, das vorgeschriben gelt gantzlich oder als vil inen dennocht daran vsstund vnd nit worden war, vff vns vnd vnser erben ze nemend vnd ze gewinnent an cristan an juden an koffen an wechseln oder an andrem schaden. Vnd wie sy des ze schaden koment ald ob sy sin ze schaden kamint von zerung von klag mit botten mit briefen von bottenlôn von gerihtz wegen ald von dehainen andren sachen, den schaden vnd daz hôptgut alles sollen wir vnd vnser erben im vnd sinen erben vsrihten vnd by guten truwen gantzlich bezaln. Es ist ôch berett worden, wer disen brief mit gunst vnd willen des obgenanten Georien Warmans oder siner erben innehât, es syen frowen oder man, dem syen wir vnd vnser erben dis vorgeschriben gult haft vnd gebunden ze gebent nach vswisung dis briefs in aller der wis als im vnd sinen erben. Vrkund dis briefs geben versigelt fur vns vnd vnser erben mit vnserm anhangenden insigel an vnsers herren vfvart abent in dem jare, do man zalt von Cristus geburt vierzehenhundert jar, darnach in dem zehenden jare.