Wir graf Fridrich von Toggenburg¹ grâf ze Brettengow² vnd ze Tâfaus³ etc. tund kund vnd vergechent offenlich mit disem brief, dz wir mit den erbern wisen dem lantamman vnd den lantluten ze Appenzell⁴ ainer satzung in ain komen sind, alz hie nach geschriben stât. Item des ersten alz sich||
die vnsern ainer satzung vormâls verbriefet hant^a gen den vorgenanten von Appenzell, die selben brief sond bi allen iren kreften beliben die jâr zil gantzlich vs, alz si wisent vnd sagent, ân gefard. Item dannenhin so sol disi nach geschribni satzung vnd ainung mit allen stuken vnd arLtikeln, alz hie nach geschriben stât, gehalten werden die nachsten funfzechen jâr gantzlich vs, so schierost, nach an ander koment nach datum diss briefs, ân gefard. Item wir vnd vnser erben, ob wir enwarint, sond och den obgenanten lantammann vnd lantluten ze Appenzell durch vnser land||
von Lutenspurg⁵ vntz ze der Zapfiten Muli⁶ nut lâsen schatgen mit zugen noch mit angriffen, alz fer wir vnd die vnser dz gewenden mugent, ân all gefard. War aber, dz dehain zug ald angrif an inen beschechen welt vnd wir vnd die vnsren des innen wurdint vnd aber dz nut gewenden mochtin, dz sond wir vnd die vnser vnverzogenlich inen kunt tun vnd sond doch vnser bestes tun, dz es gewent werd nach vnser vermugent, ân gefard. Item och sond wir graf Fridrich von Toggenburg die vnser vnd vnser erben, ob wir enwarint, den obgeseiten lantamman vnd lantluten ze Appenzell kôf geben vnd kôf zu lâsen gân, alz vil vnd alz dik si des bedurfent, vngefârlich die jar zil gantzlich vs, alz vor geschriben stât. Item die vorgenanten lantamman vnd lantlut ze Appenzell sollent och vns vnsern erben, ob wir enwarint, vnd den vnsren mit aller iren vermugent hinnenhin vnverzogenlich beholfen vnd beraten sin wider die herschaft von Osterrich vnd wider die iren vnd wider ir land vnd lut vnd och wider die, die zu inen gehoren, vnd besunder wider Veltkilch⁷ die herschaft vnd wider dz, das zu der selben herrschaft gehort, alz das der vest ritter herr Hans von Bodmen⁸ von ainer herrschaft von Osterich wegen innegehebt hât, vnd och wider Rineg⁹ die herschaft vnd wider das, das zu der selben herrschaft gehort, alz der vest ritter herr Lienhart von Jungingen¹⁰ dz och von ainer herschaft von Osterrich wegen inne gehebt hât, vnd sond dz tun nach aller ir vermugent, alz ver dz die selben zwo herrschaften Veltkilch vnd Rineg zu vnsren handen brâcht werdint, ân gefard, vs gelâsen dz Rintal¹¹, vmb die zuspruch, so wir graf Fridrich von Toggenburg die obgenanten herrschaft von Osterrich vnd die iren vor mâls bekriegt hant oder noch furbaser bekriegen mochtint vmb die schuld, so si vns schuldig sind vnd gelten sond nach vnser brief lut vnd sag, so wir von ainer herrschaft von Osterrich vnd von iren vogten herr Hansen von Bodmen vnd herr Lienharten von Jungingen dar vmb inne hant, vnd sond dz tun alz dik vnd alz vil si des von vns oder vnsern erben, ob wir enwarint, mit botten ald mit briefen ermant werden, ân gefard. Item war och, dz wir grâf Fridrich von Toggenburg ald vnser erben, ob wir enwarint, dehainost zu dem Rintal grifen weltin vmb die schuld, alz vor geschriben stât, so sond die vorgenanten lantamman vnd lantlut ze Appenzell denen im Rintal weder behulfen noch berâten sin in dehainerlay wis, dz vns ald vnsern helfern schaden ald gebresten bringen mocht, ân gefard. War och, dz die von Veltkilch die von Rineg oder die vs dem Rinta^b ald die, die zu den selben herrschaften gehorent, alz die fromen vesten ritter herr Hans von Bodmen vnd herr Lienhart von Jungingen die selben zwo herschaften mit pfleg von der herschaft von Osterrich wegen inne gehept hant, vns graf Fridrich von Toggenburg vnser erben, ob wir enwarint, ald die vnsren in den vorgenanten jârzilen dehainost bekriegen oder angrifen weltin, so sond die vorgenanten lantamman vnd lantlut ze Appenzell vns vnverzogenlich beholfen vnd berâten sin nach aller ir vermugent gen dien, die vns den bekriegen oder angriffen weltin, alz bald si des von vns mit botten ald mit briefen ermant werdent, ân gefard. War ôch, dz die vorgenanten lantamman vnd lantlut von vnser ald vnser erben wegen, ob wir enwarint, in irem lant vnd gebiet von der herschaft von Osterrich wegen agrifen wurdint oder dz si jemen von vnser wegen schatgen oder angrifen welt, dz sond wir vnd die vnsren inen helfen retten vnd weren vnverzogenlich, wenn wir des von inen gemant vnd angeruft werdent oder innen werdent, ân gefard. Item war och, dz sich fugti oder zu gieng, dz die vorgenanten lantamman vnd lantlut ze Appenzell vns vorgenanten grâf Fridrich von Toggenburg ald vnsren erben, ob wir enwarint, gehelfen mochtin vnd hulfint, dz vns die herschaft ze Veltkilch vnd ze Rineg mit allen ir zu gehorden, vs gelâsen dz Rintal, zu vnsren handen vnd in vnsren gewalt kamint, wz si denn vns furbaser hulfin gewinnen oder in nemen, da si denn mit ir panner by warint, da sol inen volgen vnd werden die anzal nach vili der luten vsrenthalb den selben kraisen der obgenanten herschaften Veltkilch vnd Rineg, ân gefard. Item es ist och berett vnd betadingot, all die wil so wir vorgenanter herr grâf Fridrich von Toggenburg ald vnser erben, ob wir enwarint, der vorgenanten geltschult nut gantzlich vsgericht vnd ab getragen werdent nach lut vnd sag der briefen, alz vor geschriben stât, wo der vorgenempt lantamman vnd lantlut ze Appenzell denn vns in den obgenanten herschaften Veltkilch vnd Rineg hilflich sind, wz da denn gefangner gefangen werdent, die selben gefangen sond vns obgenanten von Toggenburg oder vnser erben, ob wir enwarint, sin vnd vns geantwurt vnd geben werden ân all widerred vnd sumung der obgenanten von Appenzell, doch dz wir oder vnser erben, ob wir enwarint, den kosten haben sond, der von den vorgenanten zwo herrschaften Veltkilch vnd Rineg zu gieng mit buchsen vnd mit werchen, ân gefard. Item es ist berett, war das der vorgenant lantamman vnd lantlut ze Appenzell mit vns obgenanten herr von Toggenburg oder vnser erben, ob wir enwarint, ald mit den vnsren vsrenthalb den obgenanten herrschaften Veltkilch vnd Rineg dehain zu griff tatin, da sol jederman gelich an zal nemen nach vili der luten an gefangnen vnd an ander dingen vnd sond das denn gelich bekosten, wie sich das denn ayschet, vngefârlich. Item war och, dz die vorgenanten lantamman vnd lantlut ze Appenzell vns vorgedâchten herr von Toggenburg oder vnser erben, ob wir enwarint, dehainost hilflich weltin sin ald hilflich wurdint gen dem Rintal vnd das zu vnsren vnd iren handen kami, so sol jetwederm tail an land an lut vnd an nutzen vnd an allen dingen im Rintal volgen vnd werden gelich anzal nach vili der luten vngefârlich. Was och sust varent gut genomen wurd dehainost in den vorgenanten herschaften Veltkilch vnd Rineg, vs gelâsen gefangen, da sol och jederman zu gelicher putung stân nach vili der luten ân gefard. Item es ist och berett, wenn wir obgenampter herr graf Fridrich von Toggenburg oder vnser erben, ob wir enwarint, vnser obgenanten geltschuld nach lut vnd sag vnser obgenanten briefen gantzlich vs gericht bezalt vnd abgetragen wurdin vnd wir vnd sy denn darnach in den vorgenanten jâr zilen jemen bekriegen oder angriffen weltin, wo das war, da sol jederman in allen sachen nach vili der luten gelich an zal nemen ân gefard. Item ôch ist furbz berett, war das vns obgenanten herr von Toggenburg oder vnser erben, ob wir enwarint, die obgenampten herrschaften Veltkilch vnd Rineg zu vnsren handen brâcht wurdint, so sond wir oder vnser erben, ob wir enwarint, die obgenanten von Appenzell si dar durch die selben herschaften nut lâsen schatgen noch angrifen vnd och inen dar vs kôf gen ân gefard, all die wil so es in vnsren handen stât, in den vorgenanten jâr zil. Item och ist berett vnd bedingot, war dz wir obgenanter her graf Fridrich von Toggenburg oder vnser erben, ob wir enwarint, ald die vnser vnd vnser helfer in den vorgenanten herschaften Veltkilch vnd Rineg dehainost in den vorgenanten jarzilen bekriegt vberzogen ald angriffen wurdin, so sond die obgenanten landamman vnd lantlut ze Appenzell vnverzogenlich nach aller ir vermugent zu ziechen entschutten vnd vns hilflich sin, alz bald so wir oder vnser erben, ob wir enwarint, mit botten ald mit briefen si dar vmb ermanent ân gefard. Item ôch sond wir obgenampter herr grâf Fridrich von Toggenburg oder vnser erben, ob wir enwarint, mit der obgenamten herrschaft von Osterrich noch mit den iren denhain richtung frid noch satz nut vf nemen noch halten, won das wir die obgenanten lantamman vnd lantlut ze Appenzell mit vns vnd den vnsren in die richtung frid vnd satz begrifen sôn vnd si dar vs ziechen alz vns selb vnd die vnser, ân gefard. Item war ôch, dz wir obgenanter herr graf Fridrich von Toggenburg oder vnser erben, ob wir enwarint, dehain zu spruch zu den dik genanten lantamman^c vnd lantluten ze Appenzell gewunnint, des sollent wir ze baiden tailen komen vf ainen burgermaister vnd vf gemainen rât der stat Zurich, vnd wes sich den die dar vmb erkennent, da bi sollent wir ze baiden tailen beliben gantzlich ân gefard. War och, dz die vorgenanten lantamman vnd lantlut ze Appenzell och dehain zu spruch zu vns oder vnser erben, ob wir enwarint, gewunnint, des solent wir och ze baiden tailen komen vf ainen burgermaister vnd vf gemainen rât der statt ze Zurich, vnd wes sich denn die dar vmb erkennent, da bi sollent wir ze baiden tailen gantzlich beliben ân gefard. Item war och, dz der vnsren dehainer zuspruch gewunne zu dehainem von Appenzell oder zu dero dehainem, die zu inen gehorent, so sol sich der vnser rechtes lasen benugen an den stetten vnd in den gerichten, da der inne gesessen ist, zu dem er ze sprechin hât, ân gefard, es war denn, dz er rechtlôz gelâsen wurd vnd sich dz befundi, so mocht er dannenhin wol recht suchen, wo in duchti, dz es im fuglich war, an gefard. Item war och, dz dehain lantzman von Appenzell zuspruch gewunne zu dehainem der vnsern, der selb sol sich och rechtes von dem vnsren lasen benugen an den stetten vnd in den gerichten, da der vnser innegesessen ist, es war den, dz er rechtlôz gelasen wurd vnd sich dz befundi, so mocht er dannenhin wol recht suchen, wo in duchti, das es im fuglich war, ân gefard. Item wir habent och in diser ainung vns selber vorbehebt vnd vs genomen vnd vnsern erben die fromen wisen fursichtigen ainen burgermaister vnd rât vnd gemain stat ze Zurich vnd die fromen wisen ainen amman vnd gemain lantlut ze Glarus¹² vnd gemain aidgnosen ân all gefard. Item die vorgenanten landamman vnd lantlut ze Appenzell hant in selber och in diser ainung vorbehebt vnd vs genomen die fromen wisen fursichtigen ainen burgermaister vnd rât vnd gemain statt ze sant Gallen vnd gemain aidgnosen ân all gefard. Wir obgenanter grâf Fridrich von Toggenburg vergechent ain gantz wârhait fur vns vnd vnser erben alles des, so von vns an disem brief geschriben stât, vnd habent ôch gelobt, alle vorgeschribni stuk vnd artikel bi gten truwen wâr vnd stat ze haltin vnd ze lasin ân all gefard. Vnd des alles ze vrkund der wârhait so hant wir grâf Fridrich von Toggenburg herr ze Brettengow vnd ze Tâfaus da vorgenampt vnser insigel fur vns vnd vnser erben offenlich gehenket an disen brief. Der geben ist ze Vtznach¹³ in vnser stat an dem nachsten donstag nach des hailgen crutz tag, alz es funden ward, in dem jar, do man zalt von Cristus geburt fierzechen hundert jâr vnd dar nach in dem zechenden jâr.