Ich Hanns Has von Riggischwyl¹ tun kunt vnd vergich offennlich mit disem brieff, dz ich an der nachsten mitwuchen nach dem hailigen tag ze pfingsten in dem jar, als der brieff geben ist, von hayssens vnd beuelhens wegen Rudolffs Wingarters² des edeln wolerbornen mines gnedigen heren graff Fridrichs von Togkemburg³ amptman mit vollem gewalt an des vorgenanten mines heren statt offennlich ze gericht sasß ze Maggenow⁴ vor dem closter an offner fryer lanndtstraß in aller der wyß vnd maß, als ob ich zu Vtzwyl⁵ in der fryen waibelhub gesessen war, vnd kamen da fur mich die erberen Hanns, Haini vnd aber Haini vnd Verena Walthers Leners a dem Len⁶ elichy kind ze ainem tail vnd der vorgenant Walther Lener a dem Len ze dem andern tail, vnd also wurden do die vorgenanten Hanns, Haini vnd Haini vnd Verena vor mir in gericht beuogtet mit Rudin Lener irem rechten etter^b vnd nachsten vatter mag, vnd mit sunnderhait ward die selb Verena do zu mal beuogtet mit Hanses Waibels ires elichen manns gutten wyllen vnd gunst, der ouch gegenwurtig vor mir in gericht stunnd, vnd do also sy beuogtet wurden, do offnoten sy mit Rudolffen Schedler irem fursprechen vnd mit dem vorgenanten irem vogt vnd sprachen, dz sy recht vnd redlich verkoufft hettin elli ire recht an dem gutt, dz man nempt dz Len an dem Len gelegen, es war an acker an wysen an holtz an veld an wunn an waid vnd an gezimber vnd was von recht vnd von gewonhait dar zu vnd dar in gehorti, vnd die selben elli ire recht an dem vorgenanten gutt hettin sy aines rechten ewigen statten vnwiderrufflichen kouffs fur sich vnd alle ir erben vnd ouch fur ir lieben bruder Cristan vnd Hansen vnd ir erben recht vnd redlich ze kouffen geben hettin dem vorgenanten Walther Lener irem elichen vatter vnd Katherinen siner elichen hußfrowen Hannses Stetters elichy tochter vnd allen iren erben vmb VII lib. V s.d. alles Costentzer muntz, dero sy gar vnd ganntzlich von inen bezalt warin, vnd woltin sych ouch gern fur sich vnd alle ir erben in aller vorgeschribner wyß aller ir rechten an dem vorgenanten gutt, als vor stautt, verzichen vffgeben vnd da von gan vnd stan, wye recht wer vnd inen ertailt wurden, vnnd nach frag vnd vrtail do furt der vorgenant Rudi Lener die vorgenanten Verenen drystund vsser des gerichtz ring vnd fragt sy zu jegklichem mal, ob sy die verzihunng vffgebunng vnd elli vorgeschribnen^a gern vnd vnbezwungenlich tatti vnd gern tun wolti, vnnd sait ouch ze jeklichem mal vnd ze dem dritten mal bi sinem aid, dz sy sprach vnd im ze jeklichem mal gesait hette, das sy es alles gern willenklich vnd vnbezwungenlich tat vnd ouch gern tun wolt, vnd also giengen do die vorgenanten Hanns, Haini vnd Haini vnd Verena mit irem fursprechen vnd vogt dar vnd griffen an des gerichtes stab vnd gaben da ledklich vnd frilich vf alli iri recht an dem vorgenanten gut, die sy dar an gar oder an dehainem tail ye gehatten oder die sy oder ir erben hinethin daran iemerme gewunnen mochten, von iren hannden an des gerichtes stab hin zu des vorgenanten Walthers Leners ires elichen vatters vnd Katherinen sines elichen wibes iro stuffmutter vnd iro erben hannden, als recht vnd vrtail gab vnd als mit gemainer vrtail ertailt ward, vnd verzihent vnd entzyet sich ouch des alles redlich vnd recht maind^b aller fryhait aller kuntschafft brieff zugnust lut vnd alles rechten gaischlichs vnd weltlichs gerihtes aller vordrung vnd ansprach vnd zuspruch, so wir oder vnnser erben oder jeman ander von vnnser wegen oder an vnnser statt hinethin daran gewunnen oder gehaben mochten mit recht oder on recht oder mit dehainen dingen, so yeman erdencken kan, on alle geuerde, vsgelassen ainen ledigen losen anval, on alle geuerde. Die vorgenanten Hanns, Haini vnd Haini vnd Verena hand ouch gelopt fur sich vnd alle ir erben vnd ouch fur die vorgenanten Cristan vnd Hannsen ir elichen bruder vnd ir erben, des vorgenanten kouffs in aller vorgeschribner wyß des obgenanten Walthers ires elichen vatters vnd Katherinen ir stuffmutter vnd ir erben vff gaischlichen vnd weltlichen gerichten vnd allenthalben gen aller mengklichem recht gut nutz wer ze sind nach dem rechten vnd nach des landes sitten vnnd gewonhait on alle geuerde. Vnnd des alles ze warhait so han ich obgenanter richter disen brieff besigelt geben mit des vorgenanten Rudolffs Wingarters insigel, doch dem vorgenanten minem herren graff Fridrich von Toggenburg vnnd sinen erben an allen iren rechten vnschadlich, won es mir also ertailt ward, vnder dz selb insigel wir die vorgenanten Hans, Haini vnd Haini vnd Verena vnd ich Hans Waibel der vorgenanten Verenen elichen man vnd ich Rudi Lener vogt in dirre sach als vorstat vnns willenklich verbunden haben fur vnns vnd vnnser erben, hie wider niemer me ze tund. Der geben ist mit rechter vrtail vff den vorgenanten tag nach der gepurt^c vierzehenhundert jar vnnd darnach in dem zehenden jare.