Ich^a Heinrich von Wilberg¹ genant von Tossegg² burger ze Rapreschwil³ tun kunt vnd vergich offenlich mit||
disem brief allen den, die in ansehent oder horent lesen, daz ich mit wolbedachtem mut vnd mit||
guter vorbetrachtung nach rât miner frunden vnd erberer wiser luten fur mich vnd min erben hân||
recht vnd redlich verkofft vnd ze koffenn geben dem spital ze Rapreschwil disy nachbenempten guter mit holtz mit veld mit akern mit wisen mit wunne mit weid mit steg mit weg mit wasserflussen mit aller ehaffti mit allen rechten vnd zugehorden, als die selben guter von minen vordern an mich komen vnd bracht sind vngeuarlich, des ersten den Bollinger⁴ wald, item des Schniders hof, item des Schnetzers hof, item Vlis Engellinen hof vnd die reben vnd den bongarten vnd hus vnd hofstatt ze Bollingen, daz alles obrent Wurmspach⁵ vnd vndrent Bollingen gelegen vnd manlehen ist von dem erwirdigen geistlichen herren dem abt vnd sinem gotzhus ze Pfafers⁶, vnd ist och alles ledig vnd lôs denn daz zwei viertal kernen vnd zehen schilling Zuricher pfenning gewonlicher Zuricher muntz jarlich ab des Schnetzers hof gant gen Wurmspach ze selgerat, vnd ab den reben vnd ab dem bongarten gât jarlich ieklicher gepfrunter klosterfrowen ze Wurmspach ein mass wins, item vnd och den hof ze Bollingen bi der kilchen genant Gross Vlis hof, der erblehen ist von dem obgenanten abt vnd gotzhus ze Pfafers vmb achtzehen schilling pfenning der vorgenanten muntz jarlichs zinses. Vnd herumb han ich enpfangen von den pflegern vnd dem meister des vorgenanten spitales funf hundert guldin guter vnd gaber an gold vnd an gewicht, die in minen guten nutz komen sind. Vnd darumb so han ich mit guten truwen fur mich vnd min erben gelopt vnd verheissen, der vorgenanten guter sament vnd insunder mit aller zugehord also wêr vnd troster ze sin an geischlichen vnd an weltlichen gerichten vnd an allen den stetten, da es notdurfftig wirt, als ferer vnd als vil, vntz daz der vorgenant spital daran habent ist vnd in ein gewêr dabi schirmet nach lehens vnd landes recht an sinen schaden vngeuarlich. Vnd des alles ze warem vrkund han ich der obgenant Heinrich von Wilberg min eigen insigel offenlich gehenkt an disen brief. Der geben ist an sant Johans abend ze sunngihten nach Crists geburt vierzehen hundert jar, darnach in dem zehenden jare.