Ich^a Jos Gabler burger ze Rauenspurg¹ vergich offenlich an disem brief vnd tun kund aller menglich, alz ich da ettwaz stoss zuspruch vnd||
misshellung gehebt mit den ersamen vnd wysen dem burgermaister vnd dem raut vnd gemainer statt ze sant Gallen vnd besunder||
mit ettlichen iren burgern, bekenn ich in craft vnd vrkund ditz briefs, daz ich mit in nach erber wyser lut raut vmb all||
verloffen sach, die sich zwuschen vnser baider sit vntz vff disen hutigen tag verloffen hand, fruntlich vnd tugendlich verricht vnd gentzlich verainet syen vff ain gantz end, also daz wir ainander gut frund sond haissen vnd sin vnd dehain ansprauch vmb dehain verloffen sach nv hinnenthin nit me haben noch gewinnen sullen mugen noch wellen in dehain weg ân all geuerd. Vnd des ze vrkund so han ich vorgenanter Jos Gabler min aigen insigel fur mich offenlich gehenkt an disen brief. Darzu han ich erbetten den ersamen Josen Huntppis an der zit burgermaister ze Rauenspurg², daz er sin insigel ze ainer gezugknuss im selb ân schaden ouch gehenkt haut an disen brief. Der geben ist an donstag nach sant Johans tag ze sunnwendi nach Cristi geburt vierzehenhundert jaur, darnach in dem zehenden jaur.