Wir^a Cun von gotz gnaden abt des gotzhus ze sant Gallen¹, das an alles mittel zu gehort dem stul ze Rom, tund kund vnd ze wissenn manglichem||
mit disem brief, das fur vns kam ze sant Gallen vff vnserm hus vnser lieber Johans Rainhart burger ze Costentz vnd offnat vor vns, wie das der vest||
Johans von Honburg² der elter vns bi im an vnser hand vff gesendt hab die vogtye ze Vttwil³ vnd ze Kesswil⁴, die von vnserm vorgenanten gotzhus vnd vns der selb||
Johans von Honburg ze lehen gehebt hab, vnd das er vns von sinen wegen vnd an siner statt bitten solt, das ze lihenn dem wisen Hainrichen dem Ehinger stattamman ze Costentz⁵ ze lehen, won er fur vns von ehaffter sach wegen selb ietz ze mal nit komen moht. Vnd des zogt vns och do der egenant Johans Rainhart von dem egenanten Johansen von Honburg ainen offnen vff send brief mit sinem insigel ze end der geschrifft vff gedrukt, der och das also gantzlich wist vnd sait, als er vns gesait vnd fur vns braht hatt. Vnd do gab vns der egenempt Johans Rainhart in namen vnd an statt vnd von wegen des vorgenanten Johansen von Honburg des eltern die vogtie ze Vttwil vnd ze Kesswille ledklich vff an vnser hand vnd batt vns ernstlich, die selben vogtye ze lehen ze lihenn dem vorgenempten Hainrichen Ehinger. Da erhortan wir do iro baider bett, won die vns redlich dunkt, vnd lihent do ze stund bi dem egenanten Johansen Rainhart vnd mit disem offnen brief sendent wir dem vorgenanten Hainrichen Ehinger stattamman ze Costentz die vorgedahten vogtye ze Vttwill vnd Kesswille ze lehen, was wir im daran durch reht lihen sont, vns vnd vnserm vorgeschribnen gotzhus an allen vnd ieklichen vnsern rehten vnd gewonhaiten gantzlich vnschadlich vnd vnuergriffenlich. Vnd ist dis beschehen vnd vollfurt, als es ietz vnd hienach crafft vnd maht haben sol vnd mag ietz vnd hienach. Vrkund der warhait dirre vorgenanter ding habent wir obgenanter abt Cun vnser abtye insigel haissen henken an disen brief. Darnach vergih ich Johans von Honburg der elter ain gantz warhait aller vorgenanter ding, vnd darvmb dz das alles von mir vnd allen minen erben gantz war stat vnd vnwandelber belib von mir vnd allen minen erben ietz vnd hie nach, so han ich och ze merer sicherhait aller vorgenanter ding min aigen insigel fur mich vnd alle min erben offenlich gehenkt an disen brief. Geben ze sant Gallen an sant Margareten abent nach Cristi geburt vierzehenhundert jar vnd darnah in dem zehenden jare.