Wir^a Cun von gotz gnaden abt vnd der convent gemainlich des gotzhus ze sant Gallen¹ sant Benedicten ordens in Costentzer bystum||
gelegen, das an an^b alles mittel zu gehort dem stul ze Rom, tund kund vnd veriehent offenlich mit disem brief menglichem, das der wolbeLschaiden vnser lieber Johans Rainhart burger ze Costentz fur vns kam ze sant Gallen vnd zogt vns ainen versigelten vff send brief von dem||
wisen Hainrichen Ehinger stattamman ze Costentz², an dem vnd mit dem selben brief vns der selben Hainrich zu vnsern abt Cunen handen bi dem egenanten Johansen Rainhart vff sant ainen zehenden ze Holtzenstain³, der von vnserm vorgenanten gotzhus vnd vns sin lehen gewesen war vnd den selben zehenden er och geben hetti den ersamen gaistlichen frowan der maistrinen vnd dem convent ze Munsterlingen⁴. Vnd also gab vns do der egenant Johans Rainhart in namen vnd an statt des egenanten Hainrich Ehingers den vorgenanten zehenden mit siner zu gehord ledklich vff an vnser hand vnd batt vns gemain cappittel ernstlich von des egenanten Hainrich Ehingers vnd gemaines conventes wegen ze Munsterlingen, das wir von gnaden dem convent ze Munsterlingen des klosters an dem Bodemsêw⁵ ob Costentz gelegen den egedahten zehenden ze Holtzenstain aigentin, dz sy vnd ir nachkomen den nû hinnenhin fur aigen haben niessen besetzzen vnd entsetzzen sollint vnd mugint als ander ir aigen gut von vns vnd vnsern nachkomen vngesumt von der lehenschafft wegen. Da habent wir angesehen die gotzdienst, die in dem selben kloster taglich beschehent, vnd hand ainhelleklich mit gemainem rat vnsers cappittels den egenanten frowan der maistrinen vnd dem convent ze Munsterlingen den vorgedahten zehenden ze Holtzenstain, als in der egenant Hainrich Ehinger inne gehebt hat, luterlich durch got vnd in singens vnd lesens vnd gotzdienst wegen, die da selbund in dem gotzhus beschehent, fur vns vnd vnser nachkomen geaigent vnd aigenont in den selben zehenden wissentlich vnd mit disem offnen brief, das wir noch vnser nachkomen ald vnser amptlut die egedahten frowan den convent des closters ze Munsterlingen noch ir nachkomen an dem selben zehenden weder von manschafft noch lehenschafft wegen niemerme sollent noch wellent angesprechen noch bekumberren weder mit gaistlichem noch mit weltlichem geriht noch an geriht in ander weg. Vnd darvmb so verzihen vnd entwerrent wir vns ledklich fur vns vnd alle vnser nachkomen gantzlich aller reht vordrungan vnd ansprach, die wir von reht oder gewonhait der lehenschafft oder manschafft von vnsers gotzhus wegen zu dem zehenden gehebt habent ald gehaben mohtin, vnd habent och das alles getan mit aller gehugnust wort vnd werk, so nach gewonhait vnd reht vnsers vorgenanten gotzhus darzu gehortant vnd notdurftig warent vnd als es ietz vnd hie nach crafft vnd maht haben sol vnd mag ietz vnd hie nach. Vnd des ze offnem vnd warem vrkund aller vorgeschribner ding habent wir obgenanter abt Cun vnser abtye insigel vnd wir der convent vnsers cappittels insigel fur vns vnd vnser nachkomen offenlich lassen henken an disen brief. Der geben ist in vnserm vorgenanten gotzhus ze sant Gallen an sant Margareten abent nach Cristi geburt vierzehenhundert jar, darnach in dem zehenden jare.