Ich^a Rudolff Hofakrer ain priester von sant Gallen ze diser zit frumesser ze Marpach¹ in dem Rîntal² bekenn vnd vergich offenlich an disem brief fur mich vnd||
min erben vnd nachkomen allen den, die in ansehent oder horent lesen, das ich mit guter vorbetrahtunge gesundes libes vnd wolbedahtes mutes luterlich||
durch got vnd durch miner vordern vnd nachkomen selen hailes vnd trostes willen ain pfunt pfenning Costentzer muns ewiges geltes vnd jarliches zins||
ab vnd vsser minem wingarten gelegen ze Marpach, den man nemet des Swartzen wingart vnd ainhalb stôsset an des Horen wingarten von sant Gallen vnd andrunthalb an des Pfanners wingarten von Lindôw³ vnd min lehen ist von dem erwirdigen gotzhus ze sant Gallen vnd den Anna Hayderin min liebi swoster ze lipding von mir hât, mit willen gunst vnd verhengde der selben Annen miner swoster geben gefugt vnd verschaffet hân gib fug vnd verschaffen in kraft dis briefs an die vorgedahten fruyen messe ze Marpach mit solicher beschaidenhait vnd in dem rehten dinge vnd gedinge, das ich vnd alle min erben vnd nachkomen, in dero hant vnd gewalt der vorgeschriben min wingart iemer kumpt, inne hant vnd niessent nun hinnenhin nach datum dis briefs allerjarlich vnd iemer ewklich ie ze sant Martis tag ân allen abgang vnd widerred vnd ôch ân allen schaden an die vorgedahten fruyen messe ze Marpach geben rihten vnd antwurten sollen ze rehtem jarlichem zins vnd nach zins reht ze Marpach in dem dorff ain pfunt pfenning der vorgeschriben muns oder anderlay werung vnd muns da fur, so denn ie ze jar in dem Rintal geng vnd loffig ist, vngeuarlich. Welhes jares das nit geschach, so hât ain frumesser da selbs vnd ôch die pfleger vnd besorger der selben fruyen messe vnd dero helffer, wer die sind ald werdent, fryes vrlob vnd vollen gewalt, ie nach sant Martis tag, wenn sy wellent, mich vnd min erben vnd nachkomen, in dero hand denn der selbe wingart ist vnd stât, ze notent ze heftent ze pfendent vnd anzegriffent an dem vorgeschriben wingarten vnd anderswa an allen vnsren ligenden vnd varenden gutern in stetten in dorffern vff dem lande vnd allenthalb mit gaistlichem vnd weltlichem geriht vnd ân reht ân klag vnd ân zorn, wenn wa vnd wohin sy das getun mugent, als vil vnd als lang, vntz das sy ie des selben zins, der inen vssgestanden wari, vnd da mit alles des schaden, in den sy vnd iro helffer von des selben notentz heftentz pfendentz vnd angriffentz wegen komen warint, zu der obgeschriben fruyen messe handen vsgeriht vnd gantzlich ân iro schaden bezalt werdent. Vnd sol mich noch min erben noch nachkomen noch kain vnser ligent noch varent gut dauor noch da wider niht schirmen fryen noch gut sin kain burgreht lantreht fryhait gesetzt der fursten der herren der stetten noch des landes kain gaistlich noch weltlich geriht noch niht anders, so ietz ald in kunftigen ziten ieman vsgeziehen ald erdenken kan ald mag. Ich hân ôch daz vorgeschriben ain pfunt pfenning geltz an die obgedahten fruyen messe geuertgot vnd brâht, als reht sitt vnd gewonlich ist vnd billich vnd nach dem rehten kraft vnd maht sol vnd mag hân ietz vnd hienach, vnd han mich ôch verzigen vnd verzih mich mit disem brief fur mich vnd min erben des selben pfenning geltz mit aller zugehorde aller aigeschaft aller lehenschaft aller kuntschaft aller zugnust vnd gewer lut vnd brief alles rehten gaistlichs vnd weltlichs gerihtes aller vordrung vnd ansprachen aller reht vnd rehtung, so ich ald min erben bis her daran gehebt habin ald furbz iemer gehaben oder gewinnen mohtin, vnd dz wir noch nieman von vnser wegen noch an vnser statt die selben fruyen messe noch dehain ir pfleger darvmb furbz niemer sollent noch wellent ansprechen bekumberren noch in kain wis beswarren weder mit gaistlichem noch weltlichem geriht noch ân reht noch mit dehainen andren sachen in kain wis. Ich hân ôch gelôpt vnd loben mit disem brief fur mich vnd min erben, des vorgenanten pfenning geltz vnd der gâbe reht weren ze sind nach landes reht vnd die obgeschriben fruyen mess vnd ir pfleger darvmb ze versprechent vnd ze verstand ân allen iren schaden, als dik sy darvmb angesprochen vnd vfgetriben werdent mit dem rehten. Vnd des ze offemm vrkund vnd gantzer sicherhait so han ich min aigen insigel fur mich vnd min erben vnd nachkomen an disen brief gehenkt. Darnach vergich ich die vorgenant Anna Hayderin, dz disu vorgeschriben gotzgâb mit minem guten willen vnd gunst beschehen vnd volfurt ist, vnd ze merer sicherhait der selben vergicht so han ich erbetten, won ich nit aigens insigels hân, den ersamen Iohansen Grubel ôch burger ze sant Gallen, dz er sin insigel fur mich an disen brief gehenkt hat, doch im vnd sinen erben ân schaden. Geben ze sant Gallen an sant Margarethen abent der hailigen junkfrôwen in dem jare, do man zalt von Cristus geburt vierzehenhundert jar, darnach in dem zehenden jare.