Ich^a Hans Cuntzly von Hetzenwille¹ tun kunt vnd vergich offenlich fur mich fur alle min erben vnd nachkomen mit disem brief allen, die in sehent||
lesent oder horent lesen, das ich mit wolbedahtem mut guter vorbetrahtung vnd von miner redlicher not wegen sechs mutt vesan||
vnd zwen mutt haber gutes vnd vngefarliches kornes sant Galler messes jarliches zins vnd ewiges geltes von dem ab dem vnd vsser||
minem gut vnd hof ze Hetzenwille, stosset ainhalb an Geriswille² vnd anderthalb an Arnang³ vnd ze der dritten siten an Alberswille⁴, daz selb vorgenant gut vnd hof min reht fryg aigen ist, vnd gehort zu ieklicher zelg vierzehen juchart akker, ab allem vnd vsser allem dem, so zu dem obgenanten gut vnd hof gehort, es sie hus hof akker wisen wasen waiden bongarten zwi holtz ald veld gebuwens vnd vngebuwens nut vsgenomen, es sie genemt ald vngenemt, redlich vnd reht aines staten iemerwerenden koffes verkoft vnd ze koffenn geben han dem wolbeschaidenn Rudolf Schlaipfer Hainrich Schlaipfers êlicher sun burger ze sant Gallen vnd sinen erben, ob er enwar, vmb funfzehen phunt phenning alles guter vnd genamer Costentzer munse, dero ich gantzlich vnd gar von im gewert bin vnd enpfangen han vnd an minen offenn nutz bewendet. Ich han im och das vorgeschriben korngelt die sechs mutt vesan vnd die zwen mutt haber von dem vnd vsser minem vorgenanten gut ze Hetzenwille reht vnd redlich vf geben geuertgot vnd zu sinen handen braht an offner rich strasse, alz reht sitte vnd gewonlich waz vnd alz es kraft vnd maht sol vnd mag han nv vnd och hie nach, mit solicher beschaidenhait vnd in den rehten dinge vnd gedinge, das ich vnd alle min erben vnd nachkomen, in dero hand vnd gewalt daz vorgeschriben min gut vnd hof ze Hetzenwille iemer kumpt, inne hant ald niessent, dem obgenanten Rudolf Schlaipfer vnd allen sinen erben vnd nachkomen nv hinnanhin aller jarlich vnd eweklich ie vff sant Martis tag sechs mutt vesan vnd zwen mutt haber alles gutes vnd vngeuarliches kornes sant Galler messes von dem vnd vsser dem vorgeschribenen gut vnd hof vnd waz darzu ald darin gehort ze rehtem jarlichem zins ân furzug ân alle minrung ân allen abgang vnd ân allen iren schaden geben rihten vnd antwurten sont ze sant Gallen in der statt fur âcht fur banne fur krieg fur aller manglichs entweren heften in vall vnd verbieten, welhes jares wir aber daz niht tatint, so hat der obgenant Rudolf Schlaipfer vnd sin erben vnd nachkomen vnd iro helffer, wer vnd wie vil ir sint, friies vrlob vnd vollen gewalt, ie nach sant Martis tag, wenne su wellent, mich vnd alle min erben vnd nachkomen, in dero hand vnd gewalt das vorgenant min gut vnd hof ze Hetzenwille vnd waz darzu ald darin gehort ie danne ist inne hant ald niessent, ze pfendenn ze notenn ze heftenn vnd an ze griffenn an vnserm gut ligendem vnd varendem vff dem vorgeschribenen gut vnd hof vnd ander swa, wa su es begriffen vnd erlangen mugent, mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wa hin su das getun mugent ald in fugklich ist, vber alle frihait buntnuss vnd ainung, alz vil als dik vnd als lang, vntz das su ie des selben jares des zins, so in ie danne da von vssgestanden vnd niht worden war, vnd och des schaden, in den su vnd iro helffer von des selben pfendens notens heftens vnd angriffens wegen koment, gantzlich gewert vnd vsgeriht werdent. Vnd sol mich noch min erben noch nachkomen noch dehain vnser ligent noch varent gut hie vor noch hie wider niht schirmen friien noch gut sin kain burgerreht noch lantreht gesetzt gnâd enkain reht der herren des landes noch der stette, sullent och nut ze wort haben weder krieg haftung vnwetter noch vsgewachst^b noch enkainer lay ander sache behelf noch furzug, so ieman finden vsziehen oder wider disen brief erdenken kan in dehain wise. Ich han och willeklich gelobt mit miner truwe vnd loben mit disem brief fur mich vnd alle min erben, des vorgeschribenn korn geltes von dem vnd vsser dem vorgeschribenen gut vnd hof ze Hetzenwille vnd des koffes reht wer ze sinne nach fryg aigens reht vnd och den obgenanten Rudolf Schlaipfer vnd sin erben darumb ze versprechenn vnd ze verstanne an allen stetten an allen gerihten gen aller manglichem ân allen iren schaden, wenn wa vnd wie dik su des bedurffent ald darumb von ieman angesprochen geschadgot oder vfgetriben werdent mit dem rehten. Vnd des alles ze offem warem vrkunde, so han ich Hans Cuntzli da vorgenant erbetten den beschaidenn Hansen von Albersperg⁵, den man nempt Kayser, daz er sin insigel fur mich vnd min erben vnd nachkomen gehenkt hat an disen brief, vnder des insigel ich mich in diser sach willeklich gebunden han, won ich aigens insigels niht han, des och ich obgenanter Hans von Albersperg mir vnd minen erben ân schaden vergich an disem brief. Der geben ist ze sant Gallen an sant Maria Magdalenen abent in dem jar, do man zalt von Cristus geburt vierzehenhundert jar vnd darnach in dem zehenden jare. Bi diser vertgung warent diz nachgenanten erbern lut Hans von Ainwille⁶, Vlrich der Binggisser, Hans Schindler, Vlrich Suter vnd ander erber lut vil.