Wir^a Cun von gotz gnaden abt vnd der convent gemainlich des gotzhus ze sant Gallen¹ sant Benedicten ordens in Costentzer bistum gelegen,||
das an alles mittel zu gehort dem stul ze Rom, tund kund vnd veriehent offenlich mit disem brief aller manglichem, das fur^b kam der||
beschaiden Vlrich Schnetzzer Vlrich Schnetzzers baid burger ze Wil² elicher sun, vnd gab vns abt Cun fur sich vnd den obgenanten sinen elichen||
vatter vnd fur alle iro erben ledklich vnd ffrilich vff an vnser hand ain mann mad wisen gelegen in Thurow³ stosset vnderthalb an Hainrich Ledergerwen burgers ze Wil in vnsers gotzhus stat wisen vnd stoss an Rikkenbacher⁴ bach, der daran abhin gât, mit aller zu gehord. Vnd batt vns der selb Vlrich fur sich vnd an statt des egenanten Vlrich Schnetzers sines elichen vatters ernstlich, won der ze disen ziten von krankhait wegen sines libs fur vns nit komen moht, das wir got ze lob vnd den selen ze trost die selben wisen an die kilch ze Rikkenbach gelegen bi Wil, die vnserm gotzhus zu gehort, aigenen woltin, dz si nû hinnenhin der selben kilchen zu gehorren solti mit allen zugehorden, vssgenomen der zehend, der vnserm vorgenanten gotzhus zu gehort, der vns dauon werden sol jarlich, won och sin vatter vnd er die wisen fur sich vnd alle iro erben den kilchmayern da selbund die zu der selben kilchen handen vnd nûtz vmb minder gelt ze koffenn geben hettint, denn sy werd sigi. Och batent vns der selben kilchen kylchmayer ernstlich, won die selb kilch zu vnserm gotzhus gehorti, das wir in gnad tugin durch gotz vnd der sêlen hail willen vnd die selben wisen aigentin der selben kilchen ze Rikkenbach. Darvmb erhortent wir do iro aller bett vnd habent mit gemainem rat vnsers cappittels wolbedaht got ze lob vnd den sêlan ze trost fur vns vnd vnser nachkomen die vorgedahten wisen mit ir zu gehorden, vssgenomen den zehenden, der vnserm gotzhus zu gehort in der wisen, geaygent frylich, das sy nû hinnenhin an die vorgenant kilchen ze Rikkenbach gehorren sol mit rehter aigenschafft, vnd das wir noch vnser nachkomen die selben kilchen noch die kilchmayer, die ietz sint oder noch werdent, daran in dehainen weg sumen noch jerren sont, vnd darvmb so habent^c vns verzigen vnd entwert verzihen vnd entwerren vns och mit disem brief fur vns vnd vnser nachkomen hin zu der vorgenanten vnsers gotzhus kilchen handen aller reht vordrung vnd ansprachen, die wir zu der vorgenanten wisen wegen hand gehebt von lehenschafft vnd manschafft wegen ald noch gehaben vnd darzu gesprechen mohtin, es war mit gaistlichem oder mit weltlichem geriht ald an reht ald in ander weg an geuard. Vnd habent och dis alles getan vnd vollfurt redlich vnd reht mit aller hugnust wort werk vnd gebard, so darzu gehortan nûtzz vnd notdurftig warent vnd als das crafft vnd maht haben sol vnd mag ietz vnd hienach. Vnd des ze offnem vnd warem vrkund dirre vorgenanter ding vnd vergiht habent wir obgenanten abt Cun vnd der convent vnser abtye vnd vnsers cappittels insigel fur vns vnd vnser nachkomen haissen henken an disen brief. Der geben ist ze sant Gallen in vnserm gotzhus an dem nahsten samstag nach vnser lieben ffrowen tag ze mittem ogsten nach Cristi geburt vierzehenhundert jar, darnach in dem zehenden jare.